எம் & எம் வாகனங்களின் விற்பனை 19% உயர்வு

புது தில்லி: மஹிந்திரா & மஹிந்திரா நிறுவனத்தின் மொத்த விற்பனை கடந்த ஏப்ரல் மாதம் 19 சதவீதம் உயர்ந்துள்ளது.

இது குறித்து நிறுவனம் வெளியிட்டுள்ள அறிக்கையில் தெரிவிக்கப்பட்டுள்ளதாவது:

கடந்த ஏப்ரல் மாதம் நிறுவன வாகனங்களின் மொத்த விற்பனை 84,170-ஆக பதிவாகியுள்ளது. முந்தைய 2024-ஆம் ஆண்டின் இதே மாதத்தோடு ஒப்பிடுகையில் இது 19 சதவீதம் அதிகம்.

மதிப்பீட்டு மாதத்தில் பயணிகள் வாகனங்கள் பிரிவில், நிறுவனத்தின் பயன்பாட்டு வாகனங்களின் உள்நாட்டு விற்பனை 28 சதவீதம் உயர்ந்து 52,330-ஆக உள்ளது. முந்தைய 2024-ஆம் ஆண்டின் இதே மாதத்தில் இந்த எண்ணிக்கை 41,008-ஆக இருந்தது. கடந்த ஏப்ரலில் நிறுவன வர்த்தக வாகனங்களின் உள்நாட்டு விற்பனை 22,989-ஆக உள்ளது.

அந்த மாதத்தில் நிறுவன டிராக்டர்களின் விற்பனை (உள்நாட்டு விற்பனை மற்றும் ஏற்றுமதி) 8 சதவீதம் உயர்ந்து 40,054-ஆக உள்ளது. முந்தைய 2024 ஏப்ரல் மாதத்தில் இந்த எண்ணிக்கை 37,039-ஆக இருந்தது என்று அந்த அறிக்கையில் குறிப்பிடப்பட்டுள்ளது.