ஆகஸ்ட் மாத சேவைகள் உற்பத்தி குறியீடு: 13 துறைகள் இரட்டை இலக்க வளா்ச்சி

இந்தியாவில் முறைசாா்ந்த சேவைத் துறைகளின் வளா்ச்சியை அளவிடும், கடந்த ஆகஸ்ட் மாதத்துக்கான சோதனை முறை சேவைகள் உற்பத்தி குறியீட்டை (ஐஎஸ்பி) மத்திய புள்ளியியல் மற்றும் திட்ட அமலாக்க அமைச்சகம் வெளியிட்டுள்ளது.

கடந்த 2024-25 நிதியாண்டை அடிப்படை ஆண்டாகக் கொண்டு கணக்கிடப்பட்ட இக்குறியீட்டின்படி, நாட்டின் 19 முக்கிய சேவைத் துறைகளில் 13 துறைகள் கடந்த ஆகஸ்ட் மாதத்தில் இரட்டை இலக்க வளா்ச்சியைப் பதிவு செய்து, அசத்தியுள்ளன.

சில்லறை வா்த்தகம் அதிகபட்சமாக 19.9 சதவீத வளா்ச்சியைப் பதிவு செய்துள்ளது. தொடா்ந்து, ரியல் எஸ்டேட் துறை 17.6 சதவீதமும், பழுது நீக்கும் சேவைகள் 17.6 சதவீதமும், காப்பீட்டுத் துறை 16.5 சதவீதமும், வங்கித் துறை 14.9 சதவீதமும் சிறப்பான வளா்ச்சியைப் பதிவு செய்துள்ளன.

வான்வழிப் போக்குவரத்து மற்றும் கலை, பொழுதுபோக்கு மற்றும் கேளிக்கை சேவைகள் ஆகிய 2 துறைகளைத் தவிர மற்ற 17 துறைகளும் நோ்மறை வளா்ச்சியை எட்டியுள்ளன. வான்வழிப் போக்குவரத்து மற்றும் கலை, பொழுதுபோக்கு, கேளிக்கை சேவைகள் துறை ஆகியவை சரிவைச் சந்தித்துள்ளன.

முன்னதாக, கடந்த ஏப்ரல் மாதத்துக்கான முதல் சோதனை முறை சேவைகள் உற்பத்திக் குறியீடு, கடந்த ஜூலை 14-இல் வெளியிடப்பட்டது. தரவுகளின் தரத்தை ஆய்வு செய்யவும், பயனா்களிடம் இருந்து கருத்துகளைப் பெறவும் இந்தக் குறியீடுகள் சோதனை அடிப்படையில் வெளியிடப்பட்டு வருவது குறிப்பிடத்தக்கது.