பகுதி 27 – புணர்ச்சிப் பத்து - 3

புணர்ச்சி என்றால் சேர்தல் என்று பொருள். திருப்பெருந்துறையில் எழுந்தருளியிருக்கும் சிவபெருமானிடம் சேர வேண்டும் என்று விரும்பிப் பாடிய பாடல்கள் இவை.

பத்து பாடல்களைக் கொண்ட தொகுப்பு இது.

பாடலின்பம்

திகழத்திகழும் அடியும் முடியும்

காண்பான் கீழ்மேல் அயனும் மாலும்

அகழப் பறந்தும் காணமாட்டா

அம்மான், இம்மாநிலம்முழுதும்

நிகழப் பணிகொண்டு என்னைஆட்கொண்டு

ஆ!ஆ! என்ற நீர்மைஎல்லாம்

புகழப்பெறுவதுஎன்றுகொல்லோ என்

பொல்லா மணியைப் புணர்ந்தே.

*

பரிந்துவந்து பரமானந்தம்

பண்டே அடியேற்குஅருள்செய்யப்

பிரிந்துபோந்து பெருமாநிலத்தில்

அருமால்உற்றேன் என்றுஎன்று

சொரிந்த கண்ணீர் சொரிய, உள்நீர்

உரோமம்சிலிர்ப்ப, உகந்துஅன்பாய்ப்

புரிந்துநிற்பதுஎன்றுகொல்லோ என்

பொல்லா மணியைப் புணர்ந்தே.

பொருளின்பம்

சிறந்து விளங்குகின்ற எம்பெருமானின் திருவடியையும் திருமுடியையும் காண்பதற்காக, திருமால் கீழே பூமியை அகழ்ந்தான், பிரம்மன் மேலே பறந்தான், ஆனால், அவர்களால் அந்த அம்மானைக் காண இயலவில்லை,

அப்படிப்பட்ட பெருமான், இந்தப் பெரிய உலகமே அறியும்படி என்னைத் தன் அடிமையாக்கி ஆட்கொண்டான், அந்தச் சிவபெருமானின் தன்மைகளை நான் புகழ்வது எப்போது? அந்தத் துளையில்லாத மாணிக்கத்தை நான் சேர்கின்ற நாள் எப்போது?

*

எம்பெருமான் முன்பே தானாக வலியவந்து அன்போடு எனக்குப் பரமானந்தத்தை அருளினான். ஆனால், நான் அவனைப் பிரிந்துசென்றேன், இந்தப் பெரிய உலகத்தில் அரிய மயக்கத்தை அடைந்தேன்,

இதையெல்லாம் சொல்லி, கண்களிலிருந்து நீர் விடாமல் சொரிந்துகொண்டிருக்க, உள்ளம் நெகிழ, மயிர்க்கால்கள் சிலிர்க்க, அன்போடு அவனை விரும்பி, சிவபெருமானின் பெருமையை நான் புரிந்துகொள்வது எப்போது? அந்தத் துளையில்லாத மாணிக்கத்தை நான் சேர்கின்ற நாள் எப்போது?

சொல்லின்பம்

திகழத்திகழும்: மேம்பட்டுத் திகழும்

அயன்: பிரம்மன்

காணமாட்டா: காணஇயலாத

இம்மாநிலம்: இந்தப் பெரிய நிலம்

நிகழ: தெரிந்துகொள்ளும்படி

பணிகொண்டு: அடிமையாக்கி

நீர்மை: தன்மை

பொல்லா மணி: துளையில்லாத மாணிக்கம்

பரிந்துவந்து: அன்புடன் தானே வந்து

பண்டே: முன்பே

பிரிந்துபோந்து: பிரிந்துசென்று

அருமால்: அரிய மயக்கம்

உகந்து: மகிழ்ந்து