பகுதி - 423

சஞ்சரி உகந்து நின்று முரல்கின்ற தண் குவளை உந்து குழலாலும்... வண்டுகள் மகிழ்ச்சியுடன் ஒலித்து ரீங்கரிக்கின்ற குளிர்ச்சியான குவளை மலரைச் சூடியுள்ள கூந்தலைக் கொண்டும்;

தண் தரள தங்கம் அங்கம் அணிகின்ற சண்ட வித கும்ப கிரியாலும்... குளிர்ச்சியான முத்துக்களாலான மாலையையும்; தங்க நகையையும் அணிந்திருப்பதும்; வலிமை கொண்டதும்; குடத்தையும் மலையையும் ஒத்த மார்பகங்களைக் கொண்டும்;

நஞ்ச வினை ஒன்றி தஞ்சம் என வந்து நம்பி விட... நஞ்சு கலந்ததான செயலை மேற்கொண்டு, ‘நீங்களே தஞ்சம்’ என்று சொன்னபடி வந்து, நான் நம்பும்படியாக நடிக்கின்ற,

நங்கையுடன் ஆசை நண்பு உறு எனை இன்று நன்று இல் வினை கொன்று நன்று மயில் துன்றி வரவேணும்... பெண்ணிடத்தில் ஆசைகொண்டு நட்பு வைக்கின்ற என்னை, இன்றே, இப்போதே என் தகாத செயல்களை அழித்து, நன்மையைத் தருவதான மயிலின்மேல் பொருந்தி அமர்ந்த நிலையில் (என் முன்னே) வரவேண்டும்.

கஞ்ச மலர் கொன்றை தும்பை மகிழ் விஞ்சி கந்தி கமழ்கின்ற கழலோனே...

தாமரைப் பூ, கொன்றைப் பூ, தும்பை, மகிழ மலர் இவையெல்லாம் மிகுதியாகக் கலந்து மணம்வீசுகின்ற திருவடியை உடையவனே!

கன்றிடு பிணங்கள் தின்றிடு கணங்கள் கண்டு பொருகின்ற கதிர் வேலா... வாடி, உலர்ந்து, அழுகும் பிணங்களைத் தின்னும் (நாய், நரி, கழுகு, காக்கை முதலான) கூட்டங்கள் பார்க்கும்படியாகப் போரிடுபவனே!  ஒளிவீசும் வேலை ஏந்தியவனே!

செம் சொல் புனைகின்ற எங்கள் குற மங்கை திண் குயம் அணைந்த திரு மார்பா... செவ்விய சொற்களால் புனையப்பட்ட பாமாலையை அணிகின்ற எங்களுடைய குறப்பெண்ணான வள்ளியின் வலிய திருமார்பைத் தழுவியுள்ள திருமார்பனே!

செண்பகம் இலங்கும் இன் பொழில் சிறந்த சிங்கையில் அமர்ந்த பெருமாளே.... செண்பகப் பூக்கள் நிறைந்து விளங்கும் இனிய சோலைகள் திகழ்கின்ற சிங்கை எனப்படும் காங்கேயத் தலத்தில் வீற்றிருக்கின்ற பெருமாளே!

சுருக்க உரை

தாமரை, கொன்றை, தும்பை, மகிழம் போன்ற பல மலர்கள் நிறைந்து மணம்வீசும் திருவடியை உடையவனே!  உலர்ந்தும் அழுகியும் கிடக்கும் பிணங்களைத் தின்னும் நாய், நரி, காகம், கழுகு முதலான கூட்டங்கள் காணும்படியாகப் போர்புரியும் கதிர்வேலனே!  செம்மையான சொற்களால் தொடுக்கப்பட்ட பாமாலையைப் புனைபவளும்; எங்கள் குறமங்கையுமான வள்ளியம்மையின் மார்பகத்தைப் பொருந்தத் தழுவிய திருமார்பனே!  செண்பக மலர்கள் நிறைந்து விளங்குகின்ற இனிய சோலைகள் நிறைந்திருக்கின்ற சிங்கை எனப்படும் காங்கேயத் தலத்தில் வீற்றிருக்கின்ற பெருமாளே!

வண்டு மகிழ்ந்து நின்று ரீங்கரிக்கின்ற குளிர்ச்சி பொருந்திய குவளை மலரைச் சூடிய கூந்தலுடனும்; குளிர்ந்த முத்து மாலையும் பொன் ஆபரணங்களையும் அணிந்துள்ளதும்; குடத்தையும் மலையையும் ஒத்ததுமான மார்பகங்களுடனும்; நச்சுத் தன்மையுள்ள செயலைக் கடைப்பிடித்து, ‘நீங்களே தஞ்சம்’ என்று நான் நம்பும்படியாக நடிக்கின்ற பெண்ணின் மீது ஆசையையும் நட்பையும் வைக்கின்ற என் தீச்செயல்களை அழித்து, இன்றே, இப்போதே நன்மையை விளைப்பதான மயிலின்மேல் ஏறி என் முன்னே வரவேண்டும்