பகுதி - 395

கழைமுத்து மாலை புயல்முத்து மாலை... மூங்கிலிலிருந்து பிறந்த முத்துக்களாலான மாலையும்; மேகத்திலிருந்து பிறந்த முத்துக்களாலான மாலையும்;

கரிமுத்து மாலை... யானைத் தந்தத்திலிருந்து பிறந்த முத்துக்களாலான மாலையும்;

மலைமேவுங் கடிமுத்து மாலை வளைமுத்து மாலை கடல்முத்து மாலை... மலைகளின்மேல் கிடக்கும் சிறப்பான முத்துக்களாலான மாலையும்; சங்கிலிருந்து பிறக்கும் முத்துக்களாலான மாலையும்; கடலில் சிப்பியிலிருந்து தோன்றும் முத்துக்களாலான மாலையும்;

அரவீனும் அழல்முத்து மாலை... பாம்பிலிருந்து பிறப்பதும் தகிப்பதுமான நாக முத்துக்களாலான மாலையும் என,

இவைமுற்று மார்பின் அடைவொத்து உலாவ... இத்தனைவகையான முத்துமாலைகளும் உன் மார்பிலே முறையாகப் பொருந்திப் புரள;

அடியேன்முன் அடர்பச்சை மாவில்... அடியேனுக்கு முன்னாலே, அடர்ந்த பச்சை நிறம் கொண்ட குதிரையான மயில்மீது,

அருளிற்பெணோடும் அடிமைக்கு ழாமொடு அருள்வாயே... அருள்பெருக, வள்ளி தேவானையோடும், அடியார் கூட்டத்தோடும் தோன் அருள்புரிய வேண்டும்.

மழையொத்த சோதி குயில்தத்தை போலு மழலைச்சொல் ஆயி யெமையீனு... முகில் வண்ணத்தைக் கொண்டவளும்; ஜோதி ஸ்வரூபியும்; குயிலையும் கிளியையும் போல மழலைச்சொல் பேசுபவளும்; எம்மைப் பெற்ற தாயும்;

மதமத்த நீல களநித்த நாதர் மகிழ்சத்தி யீனு முருகோனே... (சடாமுடியில்) பொன் ஊமத்தை மலரை அணிந்தவரும்; நீலகண்டரும்; நடனமாடும் நாதருமான சிவபிரான் மகிழ்பவளுமான உமையம்மை பெற்றெடுத்த முருகனே!

செழுமுத்து மார்பின் அமுதத்தெய்வானை திருமுத்தி மாதின் மணவாளா... செழிப்பான முத்துமாலையை அணிகின்ற மார்பை உடையவளும்; அமுதவல்லி என்ற பெயர் கொண்டவளும்; முக்தியைத் தரவல்லவளுமான தெய்வானையம்மையின் மணவாளனே!

சிறையிட்ட சூரர் தளைவெட்டி ஞான திருமுட்ட மேவு பெருமாளே... தேவர்களைச் சிறையிலே அடைத்த சூரர்கள் அவர்களுக்கு இட்ட விலங்கை உடைத்தவனே!  ஞான வடிவினனே!  திருமுட்டத்திலே வீற்றிருக்கின்ற பெருமாளே!

சுருக்க உரை

முகில்வண்ணம் கொண்டவளும்; ஒளிபடைத்தவளும்; குயிலையும் கிளியையும் போல மழலை மிழற்றுபவளும்; எம்மைப் பெற்ற தாயும்; பொன்னூமத்தம் பூவைச் சடையில் சூடுபவரும் நீலகண்டரும் நடராசருமான சிவனார் மனம் மகிழ்பவளுமான உமையம்மை பெற்ற முருகனே!  செழித்த முத்துமாலையை அணிந்த மார்பை உடையவளும்; அமுதவல்லி என்ற பெயர்கொண்டவளும்; முத்தியைத் தரவல்லவளுமான தேவானையுடைய நாயகனே!  தேவர்களைச் சிறையிலிட்ட சூரர்கள் அவர்களுக்கிட்ட கால்விலங்கை உடைத்தவனே!  ஞான மூர்த்தியே!  திருமுட்டம் என்ற தலத்தில் வீற்றிருக்கும் பெருமாளே!

மூங்கிலிலிருந்தும்; மேகத்திலிருந்தும்; யானைத் தந்தத்திலிருந்தும்; மலையிலிருந்தும்; சங்கிலிருந்தும்; கடலில் சிப்பியிலிருந்தும்; பாம்பின் தலையிலிருந்தும் பிறக்கின்ற பலவகையான முத்துகளாலான மாலைகள் மார்பிலே புரண்டசைய; அடர்ந்த பச்சை நிறமுடையதான உன்னுடைய மயிலாகிய குதிரையின்மேலேறி, உன் தேவியரான வள்ளி தேவானையரும் அடியாரும் புடைசூழ அடியேன் முன்னே தோன்றிக் காட்சி தந்தருள வேண்டும்.