பகுதி - 601

இருவினைப் பிறவிக் கடல்மூழ்கி... நல்வினை, தீவினை ஆகியவற்றின் பயனாக ஏற்படும் பிறவியாகிய கடலிலே மூழ்கி,

இடர்கள்பட்டு அலையப் புகுதாதே... துன்பங்களை அடைந்து அலைவதற்குப் புகாதபடி,

திருவருட் கருணைப் ப்ரபையாலே... உன்னுடைய திருவருளான கருணையின் ஒளியாலே,

திரமெனக் கதியைப் பெறுவேனோ... (என்றும்) நிலைப்பதான நற்கதியை நான் அடைவேனோ (அடைய அருள வேண்டும்).

அரியயற்கு அறிதற்கு அரியானே... திருமாலாலும் பிரமனாலும்(கூட) அறிய முடியாதவனே!

அடியவர்க்கு எளிய அற்புதநேயா...அடியார்களால் எளிதாக அடைய முடிந்த அற்புதமான அன்பனே!

குருவெனச் சிவனுக்கு அருள்போதா... சிவனாருக்குக் குருவாக விளங்கி (உபதேசித்து) அருளிய ஞானாசாரியனே!

கொடுமுடிக் குமரப் பெருமாளே.... கொடுமுடியிலே வீற்றிருக்கின்ற குமரப் பெருமாளே!

சுருக்க உரை

திருமாலாலும் பிரமனாலும்கூட அறிய ஒண்ணாதவனே!  அன்பர்களால் எளிதில் அடைய வல்லவனே!  சிவனாருக்கு குருவாக இருந்து உபதேசித்தருளியவனே!  கொடுமுடியிலே வீற்றிருக்கும் குமரப் பெருமாளே!

நல்வினை, தீவினை ஆகியவற்றின் பயனாக ஏற்படும் பிறவிக் கடலிலே முழுகி, துயரங்களால் அவதிப்பட்டு அலைச்சலுறாதபடிக்கு உன்னுடைய திருவருளாகிய கருணைச் சுடரைக் கொண்டு நான் நிலையான நற்கதியைப் பெறுமாறு அருளவேண்டும்.