பகுதி - 579

திமிர மாமன மாமட மடமையேன் இடர் ஆணவ திமிரமே யரி சூரிய... இருள் நிறைந்த மனத்தையும் மிகுந்த அறியாமையையும் உடைய என்னுடைய ஆணவமாகிய இருட்டை விலக்குகின்ற (ஞானமாகிய) சூரியனே! 

திரிலோக தினகரா சிவ காரண பனக பூஷண ஆரண சிவசுதா அரி நாரணன் மருகோனே... மூவுலகங்களுக்கும் ஒளி தருகின்ற தினகரனே!  சிவனே!  மூல காரணனே!  நாகங்களை அணிந்தவரும் வேத முதல்வருமான சிவபெருமானின் மகனே! ஹரியாகிய திருமாலின் மருகனே!

குமரி சாமளை மாது உமை அமலி யாமளை பூரணி குணகலாநிதி நாரணி தருகோவே... குமரியும்; கரியநிறம் கொண்டவளும்; உமையம்மையும்; மாசற்றவளும்; பச்சை வண்ணத்தவளும்; பூரணமானவளும்; குணச்செல்வியுமான நாராயணி அருளிய முதல்வனே!

குருகுகா குமரேசுர சரவணா சகளேசுர குறவர் மாமகள் ஆசைகொள் மணியே... குருவே!  குகனே!  குமரேசனே!  சரவணனே! உருவத் திருமேனியை உடைய ஈசனே!  குறவர் மகளான வள்ளி விரும்புகின்ற மணியே! 

சம் பமர பார ப்ரபா அருண படல தாரக மாசுக பசுர பாடன பாளித பகளேச... வண்டுகள் நன்றாக மொய்ப்பதும்; நிறைந்ததும்; ஒளிவீசுவதும்; சிவந்த நிறமுடையதும்; கொத்தானதுமான வெட்சி மாலைகளை அணிந்தவனே!  பேரின்பப் பொருளே!  (தேவாரப்) பாசுரங்களை உலகுக்குப் பாடியளித்த (திருஞான சம்பந்தனே)! செம்பட்டு ஆடையை அணிந்தவனே!  மலைகளின் தலைவனே! 

பசித பாரண வாரண துவச ஏடக மாவயில் பரவு பாணித பாவல பரயோக... திருநீற்றால் திருப்தியடைபவனே!  சேவலைக் கொடியாகக் கொண்டவனே!  மேன்மைமிக்கதும் பெரியதுமான வேலைக் கரத்தில் ஏந்தியவனே!  பாக்களில் வல்லவனே!  மேலான யோகத்தின் மூர்த்தியே! 

சம பராமத சாதல சமயம் ஆறிரு தேவத சமய நாயக மாமயில் முதுவீர... வாதப் போரிலே ஈடுபடுகின்ற பரசமயங்களான பௌத்தம், சமணம் போன்றவற்றின் அழிவுக்குக் காரணமாக விளங்கியவனே!  ஆறு சமயங்களுக்கும் உரிய* பெரிய தேவனே!  அழகிய மயிலை வாகனமாகக் கொண்ட பெரிய வீரனே!

(‘ஆறிரு தேவத சமய நாயக’ என்பதை ‘ஆறு சமய இருதேவத நாயக’ என்று அன்வயப்படுத்துக.)

சகலலோகமும் ஆசறு சகல வேதமுமேதொழு சமர மாபுரி மேவிய பெருமாளே.... எல்லா உலகங்களும் குற்றமற்றவையான எல்லா வேதங்களும் தொழுகின்ற திருப்போரூரில் வீற்றிருக்கின்ற பெருமாளே!

சுருக்க உரை

இருள் நிறைந்த மனத்தையும் மிகுந்த அறியாமையையும் உடையவனான எனது ஆணவமாகிய இருட்டை விலக்குகின்ற ஞான சூரியனே!  மூவுலகங்களுக்கும் ஒளிதருபவனான சூரியனே!  சிவனே! மூல காரணனே!  நாகாபரணரும் வேதமுதல்வருமான சிவனாருடைய புத்திரனே!  திருமாலின் மருகனே!  குமரியும்; கரியநிறம் கொண்டவளும்; உமையம்மையும்; மாசற்றவளும்; பச்சை வண்ணத்தவளும்; பூரணமானவளும்; குணச்செல்வியுமான நாராயணி அருளிய முதல்வனே! குருவே!  குகனே!  குமரேசனே!  சரவணனே! உருவத் திருமேனியை உடைய ஈசனே!  குறவர் மகளான வள்ளி விரும்புகின்ற மணியே!

வண்டுகள் நன்றாக மொய்ப்பதும்; நிறைந்ததும்; ஒளிவீசுவதும்; சிவந்த நிறமுடையதும்; கொத்தானதுமான வெட்சி மாலைகளை அணிந்தவனே!  பேரின்பப் பொருளே!  (தேவாரப்) பாசுரங்களை உலகுக்குப் பாடியளித்த (திருஞான சம்பந்தனே)! செம்பட்டு ஆடையை அணிந்தவனே!  மலைகளின் தலைவனே!  திருநீற்றால் திருப்தியடைபவனே!  சேவலைக் கொடியாகக் கொண்டவனே!  மேன்மைமிக்கதும் பெரியதுமான வேலைக் கரத்தில் ஏந்தியவனே!  பாக்களில் வல்லவனே!  மேலான யோகத்தின் மூர்த்தியே!  வாதப் போரிலே ஈடுபடுகின்ற பரசமயங்களான பௌத்தம், சமணம் போன்றவற்றின் அழிவுக்குக் காரணமாக விளங்கியவனே!  ஆறு சமயங்களுக்கும் உரிய பெரிய தேவனே!  அழகிய மயிலை வாகனமாகக் கொண்ட பெரிய வீரனே!  எல்லா உலகங்களும் குற்றமற்றவையான எல்லா வேதங்களும் தொழுகின்ற திருப்போரூரில் வீற்றிருக்கின்ற பெருமாளே!  உன்னைத் துதிக்கின்றேன்.