பகுதி - 499

குழைக்கும் சந்தனச் செம் குங்குமத்தின் சந்த நல் குன்றம் குலுக்கும் பைங்கொடிக்கு என்று... குழைத்திருக்கின்ற சந்தனக் கலவையையும் சிவந்த குங்குமச் சாந்தையும் பூசியதும்; அழகிய, பெரிய குன்றத்தை ஒத்த மார்பகங்களைக் குலுக்குகிற பசிய கொடியைப்போலக் காட்சியளித்து,

இங்கு இயலாலே குழைக்கும் குண் குமிழ்க்கும் சென்று உரைக்கும் செம் கயல் கண்... இயல்பாகவே, குண்டலம் தரித்த காதினிடத்திலும் குமிழம் பூவைப் போன்ற நிறமுள்ள மூக்கினிடத்திலும் சென்று பேசுவதைப் போன்ற சிவந்த, கயல் போன்ற கண்களைக்,

கொண்டு அழைக்கும் பண் தழைக்கும் சிங்கியராலே... கொண்டு அழைக்கின்றவர்களும்; இசையைப் போல ஒலிக்கும் குரல்வளத்தையுடைய, நாணமற்ற பெண்களின் காரணமாக,

உழைக்கும் சங்கடத் துன்பன் சுக பண்டம் சுகித்து உண்டு உண்டு... உழைத்து (அவதியுறுவதால்) வருகின்ற சங்கடங்களையும் துன்பங்களையும் அடைந்திருப்பவனாகிய நான், சுகமான பண்டங்களை அனுபவித்துத் தின்று தின்று,

உடல் பிண்டம் பருத்து இன்று இங்கு உழலாதே... உடலாகிய பிண்டம் பருத்துப் போய் இந்த உலகத்தில் கிடந்து உழலாமல்,

உதிக்கும் செம் கதிர்ச் சிந்தும் ப்ரபைக்கு ஒன்றும் சிவக்கும் தண்டு... உதிக்கின்ற சிவந்த சூரியன் வீசுகின்ற ஒளிக்கு ஒப்பானதான தண்டையணிந்து சிவந்ததும்,

உயர்க்கும் கிண்கிணிச் செம் பஞ்சு அடி சேராய்... மேன்மையுடைய கிண்கிணியை அணிந்ததும், செம்பஞ்சுபோலச் சிவந்ததுமான பாதத்திலே என்னைச் சேர்த்துக்கொள்ள வேண்டும்.

தழைக்கும் கொன்றையைச் செம்பொன் சடைக்கு அண்ட அங்கியைத் தங்கும் தரத்த செம் புயத்து ஒன்றும் பெருமானார்... தழைத்திருப்பதான கொன்றைப் பூவைச் செம்பொன்னை ஒத்த சடையிலே சேர்த்துக்கொண்டு; சிவந்த கையிலே தீயை ஏந்துபவரான சிவபெருமானுடைய,

தனிப் பங்கின் புறத்தின் செம் பரத்தின் பங்கயத்தின் சஞ்சரிக்கும் சங்கரிக்கு என்றும் பெரு வாழ்வே... ஒப்பில்லாத இடது பக்கத்திலும்; சிறந்த பரமண்டலத்திலும்; தாமரையிலே இருந்தபடியும் இருப்பவரான சங்கரியுடைய நல்ல மகனே!

கழைக்கும் குஞ்சரக் கொம்பும் கலைக் கொம்பும் கதித்து என்றும் கயல் கண் பண்பு அளிக்கும் புய வேளே... அங்குசத்தால் அடக்கப்படும் ஐராவதம் வளர்த்த கொடியைப் போன்ற தேவானைக்கும்; மானிடத்திலே பிறந்த வள்ளிக்கும் அவர்களையை மீன்போன்ற கண்களுக்கு மகிழ்ச்சியைத் தருகின்ற திண்மையான தோள்களை உடையவனே!

கறுக்கும் கொண்டலில் பொங்கும் கடல் சங்கம் கொழிக்கும் செந்திலில் கொண்டு அன்பினில் தங்கும் பெருமாளே.... கார்மேகத்தைப் போலப் பொங்கியெழுந்து; சங்குகளைக் கரையிலே கொண்டுவந்து கொட்டுகிற (கடல் சூழ்ந்த) திருச்செந்தூரில் அன்போடு வீற்றிருக்கின்ற பெருமாளே!

சுருக்க உரை

தழைத்திருக்கின்ற கொன்றையைத் தன் சிவந்த சடையில் சூட்டியவரும்; தேன் கரத்திலே அக்கினியை ஏந்துபவருமான சிவபெருமானுடைய இடது பாகத்திலும்; பரமண்டலங்களிலும்; தாமரைப் பூவிலும் இருப்பவரான சங்கரி மனம்மகிழும் சிறந்த மகனே!  அங்குசத்தால் அடக்கப்படும் ஐராவதம் வளர்த்தவரான தேவானையும்; மானிடத்திலே பிறந்தவரான வள்ளியும் அவர்களுடை கண்கள் மகிழ்ச்சியால் பூரிக்கும் வண்ணம் திண்மையான தோள்களை உடையவனே!  கார்மேகத்தைப் போலப் பொங்கியெழும் கடல், கரையிலே சங்குகளைக் கொண்டுவந்து கொட்டுகின்ற திருச்செந்தூரில் அன்போடு வீற்றிருக்கின்ற பெருமாளே!

சந்தனத்தையும் குங்குமத்தையும் பூசிய மார்பகங்களை அசைக்கின்ற பூங்கொடிகளைப் போன்றவர்களும்; குழைபூண்ட செவிகளிடத்திலும் குமிழம்பூவைப் போன்ற நிறத்தையுடைய நாசியிடத்திலும் சென்று பேசுவதைப் போல பரந்திருக்கிற கண்களை உடைய நாணமற்றவர்களான விலைமாதர்களின் காரணத்தாலே நான் உலகத்தில் பல துன்பங்களையும் அடைந்து வீணில் அலையாமல், தண்டையும் கிண்கிணியும் கொஞ்சும் உன்னுடைய திருவடிகளிலே என்னைச் சேர்த்துக்கொண்டு அருள்வாயாக.