நீதியைத் தேடி: - கோ. மன்றவாணன்

மாணவர்களிடம் பணம்வாங்கிக்கொண்டு
பாஸ் போடுகிறார்
ஆசிரியர்

கள்வனை விட்டுவிட்டு
பறிகொடுத்தவனைக் கைது செய்கிறது
காவல் துறை

அரசுக் கோப்புகளை நகர்த்தும் சக்தி
குறுக்கு வழியில் பணம்குவித்த
குபேரர்களுக்குத்தான் உண்டு

கல்வியும் மருத்துவமும்
ஏழைகளுக்கு எட்டாத
சந்திர சூரியர்கள்

நித்தமும்
நீதியைத் தேடி
நீதிமன்றம் செல்கிறேன்

அங்கே
ஓங்கி உயர்ந்து
உலகளந்து நிற்கிறது
அநீதியின் தரிசனம்

தொண்டு செய்யும் நல்லவர்நோ
யில் நொடிந்து
பாயில் நைந்து
வறுமையில் வதங்குகிறார்

மாபாதகங்கள் செய்தும்
மகிழுந்தில்
மகாராஜாக்களாக வருகிறார்கள்
பொல்லாதவர்கள்
அவர்களைக் கைகூப்பித் தொழுகிறது
உலகம்

நல்லது செய்வோர்க்கு நல்லது நடக்கவும்
கெட்டது செய்வோர்க்குக் கெட்டது நடக்கவும்
வேண்டி முறையிட்டேன்
கடவுள் நீதிமன்றத்தில்

நேற்றே
அவர் கோவிலிருந்து
அமெரிக்காவுக்குக் கடத்தப்பட்டதாக
இன்று
பத்திரிகைகளில் பரபரப்புச் செய்தி