மழை இரவு

மழையே மழையே
மகிழ்ந்து மகிழ்ந்து 
குழந்தைபோல் விளையாட  
விண்ணுக்கும் மண்ணுக்கும் 
ஏணி அமைக்க வா !

மழையே மழையே 
பகலவன் சூடு தணிய 
விண்ணில் விளையாடும் 
கருமேகமே மழைத்துளிகளை
மண்ணுக்கு மலர்போல் 
இரவில் அள்ளி வீசு !

மழையே அந்தி மழையே 
விண்ணில் சிந்து பாடி 
மண்ணில் நொந்த உயிர்கள்
மகிழ்ந்து வாழ – நீ 
மண்ணில் வந்து விளையாடு !

மழையே இரவு மழையே 
மண்ணில் நீ வீழ்ந்தால் 
மரம் செடிகொடிகள் 
மகிழ்ந்து தலையாட்டும்
விண்ணில் தோன்றும் 
முழுநிலவு மறைந்து
நின்று குடை பிடிக்கும் !

இரவில் 
பெய்யும் மழைத்துளிகள் 
ஏழையின் குடிசையில்
தலையாட்டும் மண்பானையில்
இனிய ஜலதரங்கம் 
விடிய விடிய இசைக்கும் !
 
- பொன்விலங்கு பூ.சுப்ரமணியன் 
வன்னியம்பட்டி, ஸ்ரீவில்லிபுத்தூர் வட்டம்