யார் இட்ட சாபம்: கவிஞர் டாக்டர் எஸ். பார்த்தசாரதி

தங்கத்தொட்டிலில்
தவழ்ந்து
தாய்ப்பால் குடிக்க ஆசை –
காசை மறந்த பாசம்
அதைக்காட்டும் உறவுகள்
ஒட்டிவிட ஆசை –
இரண்டரை வயதில்
இரட்டிப்பு மகிழ்ச்சியுடன்
விளையாட்டுப்பள்ளியில்
விழுந்துருள ஆசை –
பசியே தெரியாமல்
பகட்டுத்துணிகளுடன்
படிப்பு மாளிகைக்கு
அடித்தளம் அமைக்க ஆசை –
புல் தரைகளுக்கிடையில்
“புக்” வகுப்புகளோ
“டெக்” வகுப்புகளோ,
அங்கே தான்
அறிவுத்திசுக்களைப்
பெருக்கிவிட ஆசை--
சறுக்கும் பாடத்தில்
சிறப்பு வகுப்புகள்
பெற்றுவிட ஆசை--
சிவகாசியில் சிறுவர் பலருக்கு
எல்லாம் ஆசையில்  
நின்றதோ ?
அந்தப்பிஞ்சுக்கைகளில்
பேனா இல்லையே ?
விரல்கள் பிடிக்குமே தீக்குச்சிகளை ?
இது யார் இட்ட சாபம் ?