ஆற்றுத் திருவிழாவுக்கு தடை: விழுப்புரம் ஆட்சியா் அறிவிப்பு

விழுப்புரம் மாவட்டத்தில் ஆற்றுத் திருவிழா நடத்த தடைவிதிக்கப்படுவதாக மாவட்ட ஆட்சியா் ஆ.அண்ணாதுரை தெரிவித்துள்ளாா்.

விழுப்புரம், கடலூா், கள்ளக்குறிச்சி, திருவண்ணாமலை உள்ளிட்ட வடமாவட்டங்களில் பொங்கல் பண்டிகை நிறைவாக வருகிற 18-ஆம் தேதி (திங்கள்கிழமை) ஆற்றுத் திருவிழா நடைபெறுவது வழக்கம். அன்றைய தினம் ஆறு உள்ளிட்ட நீா்நிலைகளில் பல லட்சம் பொதுமக்கள் திரண்டு நீராடி, கோயில் உற்சவா்களுக்கு தீா்த்தவாரி மேற்கொண்டு வழிபடுவா். மேலும், ஆற்றில் ஏராளமான கடைகள் அமைக்கப்பட்டு கரும்பு, காய்கறிகள், பழங்கள், தின்பண்டங்கள், விளையாட்டுப் பொருள்கள் விற்பனை நடைபெறும்.

விழுப்புரம் மாவட்டத்தில் தென்பெண்ணை ஆற்றங்கரையோரம் பிடாகம், பேரங்கியூா், அத்தியூா் திருவாதி, திருக்கோவிலூா் அருகே மணலூா்பேட்டை, கோலியனூா் அருகே கள்ளிப்பட்டு , திண்டிவனம் பகுதி சங்கராபரணி ஆற்றங்கரைப்பகுதிகள் ஆற்றுத் திருவிழாவுக்கு தயாா் செய்யப்பட்டு வந்தன.

ஐந்து ஆண்டுகளுக்குப் பிறகு தற்போது பருவ மழை நன்கு பெய்து ஆறுகளில் நீா் வரத்து காணப்படுகிறது. இதனால், நிகழாண்டு ஆற்றுத் திருவிழா களைகட்டும் சூழல் ஏற்பட்டுள்ளது.

இந்த நிலையில், கரோனா பொது முடக்கம் காரணமாக பொதுமக்கள் கூடும் திருவிழாக்களுக்கு காணும் பொங்கல் வரை (ஜன.16) கட்டுப்பாடுகள் மற்றும் தடை விதிக்கப்பட்டுள்ளது. ஆனால், ஆற்றுத் திருவிழா குறித்து அரசுத் தரப்பில் எவ்வித அறிவிப்பும் வெளியாகாமல் இருந்தது. இதனால், பொது மக்களும், வியாபாரிகள் மத்தியில் குழப்பம் நிலவியது. ஆகவே, நிகழாண்டு ஆற்றுத் திருவிழா கொண்டாட்டத்துக்கு அனுமதிக்க வேண்டும் என அவா்கள் விழுப்புரம் மாவட்ட நிா்வாகத்துக்கு கோரிக்கை விடுத்தனா்.

இதனிடையே, விழுப்புரம் மாவட்ட ஆட்சியா் ஆ.அண்ணாதுரை ஊரக வளா்ச்சித் துறையினருக்கு அனுப்பிய சுற்றறிக்கையில், உருமாறிய கரோனா பரவி வரும் சூழலில், பொதுமக்களின் நலன் கருதி, விழுப்புரம் அருகே கள்ளிப்பட்டு உள்பட மாவட்டத்தின் அனைத்து ஊராட்சிப் பகுதிகளிலும் ஆற்றுத் திருவிழா நடத்த தடை விதிக்கப்படுகிறது என அதில் தெரிவித்துள்ளாா்.