23 குவாரிகளை தற்காலிகமாக மூட வேண்டும்: அமைச்சா் டி.கே.பிரபு

விருதுநகா் மாவட்டத்தில் அரசின் விதிமீறல்களுடன் செயல்பட்டு வந்த 23 குவாரிகளை தற்காலிகமாக மூட இயற்கை வளங்கள் துறை அமைச்சா் டி.கே. பிரபு செவ்வாய்க்கிழமை உத்தரவிட்டாா்.

விருதுநகா் மாவட்டத்தில் செயல்பட்டு வரும் கல் குவாரிகளில் பல இடங்களில் அரசின் விதிமுறைகள் முறையாகப் பின்பற்றப்படவில்லை என தொடா்ந்து புகாா்கள் வந்தன. இதையடுத்து, மாவட்டம் முழுவதும் ஆளில்லா விமானம் மூலம் 76 குவாரிகளில் அளவீடு செய்யப்பட்டு, அதிகாரிகள் ஆய்வு செய்தனா்.

இந்த ஆய்வில் சுற்றுச்சூழல் அனுமதி, பாதுகாப்பு நடைமுறைகள், நிா்ணயிக்கப்பட்ட அளவை மீறி கனிம வளங்கள் எடுப்பு, உரிய ஆவணங்கள் பராமரிக்காதது உள்ளிட்ட பல்வேறு விதிமுறை மீறல்கள் கண்டறியப்பட்டதாகக் கூறப்படுகிறது.

இந்த நிலையில், மாவட்டத்தில் பல்வேறு பகுதிகளுக்கு செவ்வாய்க்கிழமை நேரடியாக சென்று குவாரிகளில் அமைச்சா் டி.கே. பிரபு ஆய்வு செய்தாா். அப்போது, திருச்சுழியை அடுத்த புலியைரான் பகுதியில் உள்ள ஒரு தனியாா் கல் குவாரிக்குள் இறங்கி அமைச்சா் ஆய்வு செய்தாா். பின்னா், அங்கு பணிபுரியும் வட மாநிலத்தைச் சோ்ந்தவா்களிடம் பாதுகாப்பு குறித்து கேட்டறிந்தாா்.

இதைத் தொடா்ந்து, அதிக திறன் கொண்ட வெடிகளை குவாரிகளில் வெடிக்கத் தடை விதிக்க அவா் உத்தரவிட்டாா். இந்த நிலையில், விருதுநகா் மாவட்டத்தில் விதிமுறைகளை பின்பற்றாமல் செயல்பட்டு வந்த 23 குவாரிகளை தற்காலிகமாக மூட அமைச்சா் உத்தரவிட்டாா்.

மேலும், சட்டவிரோதமாக இயங்கும் குவாரிகள் மீது கடும் நடவடிக்கை எடுக்கப்படும் என அமைச்சா் எச்சரிக்கை விடுத்தாா்.