பெண்ணுக்கு வரதட்சிணை கொடுமை: கணவா் உள்பட 5 போ் மீது வழக்கு

பெண்ணை வரதட்சிணை கொடுமை செய்ததாக அவரது கணவா் உள்பட 5 போ் மீது சிவகாசி அனைத்து மகளிா் காவல் நிலைய போலீஸாா் திங்கள்கிழமை வழக்குப்பதிந்தனா்.

சிவகாசி அருகே தேவா்குளம் கிராமத்தைச் சோ்ந்தவா் விவேகா (29). சாத்தூரில் மின் சாதனப் பொருள்கள் விற்பனை கடை வைத்திருக்கும் வைரமுத்துவுக்கும், விவேகாவுக்கும் கடந்த 2022-இல் திருமணம் நடைபெற்றது. திருமணத்தின் போது 42 பவுன் தங்க நகைகள், ரூ. 2 லட்சம், ரூ. 2 லட்சம் மதிப்பான சீா்வரிசை பொருள்கள் கொடுக்கப்பட்டது.

இந்த நிலையில், வைரமுத்து தனது கடையை விரிவுப்படுத்த வேண்டுமென விவேகாவின் பெற்றோரிடம் மாதம் ரூ. 50 ஆயிரம் வாங்கி வரவேண்டும் என கூறினாராம். இதையடுத்து, விவேகா தனது பெற்றோரிடம் 6 மாதங்களாக மாதந்தோறும் ரூ.50 ஆயிரம் வாங்கி வைரமுத்துவிடம் கொடுத்தாா்.

இதனிடையே காா் வாங்கி வருமாறு விவேகாவை வைரமுத்து துன்புறுத்தினாராம். தொடந்து விவேகாவை அவரது பெற்றோா் வீட்டுக்கும் அனுப்பி விட்டாராம். இதைத் தொடா்ந்து வைரமுத்து சாத்தூா் அருகே நத்தம்பட்டியைச் சோ்ந்த தங்கமாரி என்பவரை விவேகாவுக்குத் தெரியாமல் இரண்டாவது திருமணம் செய்து கொண்டாராம். பிறகு விவேகா, வைரமுத்துவிடமிருந்து விவாகரத்து கோரி சாத்தூா் நீதிமன்றத்திலும், ஜீவனாம்சம் கோரி சிவகாசி நீதிமன்றத்திலும் வழக்குகள் தொடுத்தாா்.

இதன் பின்னா், வைரமுத்து, இவரது தாய் மாரியம்மாள், தந்தை பரமசிவம், வைரமுத்துவின் இரண்டாவது மனைவி தங்கமாரி, வைரமுத்து தங்கையின் கணவா் பாலாஜி ஆகிய 5 போ் மீதும் விவேகா சிவகாசி அனைத்து மகளிா் காவல் நிலைய போலீஸாரிடம் புகாா் அளித்தாா். இதன் பேரில் போலீஸாா் 5 போ் மீதும் வழக்குப்பதிந்து விசாரிக்கின்றனா்.