பாதை மாறும் பிரியங்கா மோகன்!

கன்னடப் படமான "ஒந்து கதை ஹெல' மூலம் அறிமுகமாகி தெலுங்கில் நானியுடன் ஜோடி சேர்ந்து "கேங் லீடர்' படம் மூலம் அறிமுகமானவர் "பார்பி டால்' என்று சொல்லப்படும் பிரியங்கா மோகன்.

பிரியங்காவுக்கு வயது 28 என்று சொல்ல முடியாத உடல்வாகு. அப்பா தமிழ்நாட்டுக்காரர். அம்மா கர்நாடகத்தைச் சேர்ந்தவர். படித்தது வளர்ந்தது பெங்களூரில்; பயோடெக்னாலஜியில் பி.டெக். பட்டம் பெற்றதும் நடிக்க வந்துவிட்டார்.

தமிழில் சரளமாகப் பேசும் பிரியங்கா, நெல்சன் இயக்கத்தில் சிவகார்த்திகேயனின் ஜோடியாக "டாக்டர்' படத்தில் அறிமுகமானார்.

பிரியங்காவின் இரண்டாவது தமிழ் படம் "எதற்கும் துணிந்தவன்'. பிரியங்கா சூர்யாவின் ஜோடி. மூன்றாவது படம் "டான்'. சிவகார்த்திகேயனுடன் இரண்டாவது முறையாக ஜோடி சேர்ந்தார் பிரியங்கா.

தமிழுக்கு சில்லென்று புதிய காற்றாய் பிரியங்கா மோகனை அறிமுகம் செய்ததற்காக ரசிகர்கள் இயக்குநர் நெல்சனுக்கு நன்றி சொல்ல, பிரியங்கா யாருக்கு நன்றி சொல்கிறார் தெரியுமா ?

பிரியங்காவே கூறும்போது, ""அப்போது நான் தெலுங்குப் படத்தில் நடித்துக் கொண்டிருந்தேன். பிரபல ஒளிப்பதிவாளர் பி.சி ஸ்ரீராம் என்னைப் படம் பிடித்து அவரது வலைதளப் பக்கத்தில் பதிவிட, அதைப் பார்த்த சிவகார்த்திகேயன் அவர் நண்பரும் இயக்குநருமான நெல்சனிடம் காண்பித்தார். பின்னர், "டாக்டர்' படத்தில் நடிக்க ஒப்பந்தம் ஆனேன்'' என்கிறார்.

பிரியங்கா நடித்திருக்கும் மூன்று தமிழ் படங்களிலும் சரி. தெலுங்கு, கன்னடப் படத்திலும் சரி. "தனக்கும் கவர்ச்சிக்கும் தூரம் அதிகம்' என்று சொல்லும் விதத்தில் அடக்கம் ஒடுக்கமாக பிரியங்கா நடித்திருந்தார்.

ரஜினியின் அடுத்த படமான "ஜெயிலர்' படத்தில் இயக்குநர் நெல்சன், தான் அறிமுகம் செய்துவைத்த பிரியங்காவை ரஜினியின் மகளாக நடிக்க வைப்பார் என்று சொல்லப்பட்டாலும் பிரியங்கா மோகன் நடிக்கவில்லை.

"பீஸ்ட்' படம் வெளியானதைத் தொடர்ந்து படத்தின் இயக்குநர் நெல்சன் தனது குடும்பத்துடன், நண்பர்கள் நடிகர் கவின், ரெட்டின் கிங்ஸ்லி, சுனில் ஆகியோருடன் பிரியங்கா துபாய்க்கு சுற்றுலா சென்றுவந்தார்.

பிரியங்கா, அருண் மாதேஸ்வரன் இயக்கத்தில் உருவாகி வரும் "கேப்டன் மில்லர்' படத்தில் நடிகர் தனுஷுக்கு ஜோடியாக நடித்து வருகிறார். "ஒரு கல் ஒரு கண்ணாடி', "சிவா மனசுல சக்தி' என்ற படங்களை இயக்கிய எம்.ராஜேஷ் இயக்கும் பெயரிடப்படாத திரைப்படத்தில் ஜெயம் ரவிக்கு ஜோடியாக பிரியங்கா நடிக்க உள்ளார். ஆக இரண்டே இரண்டு தமிழ் படங்கள்.

அதனால் என்னவோ? பிரியங்கா, இதர இளம் நடிகைகள் செய்வது போல கவர்ச்சியாக போட்டோ ஷூட் நடத்தி தனது இன்ஸ்ட்டாகிராம் பக்கத்தில் பதிவு செய்து வருவது பிரியங்காவின் ரசிகர்களை திகைக்க வைத்திருக்கிறது. தமிழில் பிசி நடிகையாக மாற பிரியங்கா "இது கவர்ச்சியின் தொடக்கம்தான்' என்று சொல்லாமல் சொல்கிறாரோ பாதை மாறும் பிரியங்கா !