பெண்கள் பாதுகாப்பு... முகநூலில் புதிய சேவை!

மாணவர்கள் முதல் பெரியவர்கள் வரை சமூக வலைதளங்களைப் பொழுதுபோக்குக்காகப் பயன்படுத்தி வருகின்றனர். பாதுகாப்புடன் பயன்படுத்த தவறுவதால், சிலர் தங்கள் வாழ்க்கையையே தொலைத்து விடுகிறார்கள். குறிப்பாக, பெண்கள் தங்கள் வாழ்க்கை முழுவதும் பல்வேறு இன்னல்களுக்கும், மிரட்டல்களுக்கும் ஆளாகின்றனர். முகநூலில் பகிரப்படும் பெண்களின் புகைப்படங்களை எடுத்து தவறாகச் சித்திரிக்கும் சம்பவங்கள் நாளுக்குநாள் அதிகரித்து வருகின்றன. அதிலும், பள்ளி, கல்லூரி மாணவிகள், பணியாற்றும் பெண்கள் இதுபோன்ற பிரச்னைகளில் சிக்கி வாழ்க்கையை முடித்து கொள்ளும் அளவுக்குச் சென்றுவிடுகின்றனர்.

நீண்ட காலம் நீடித்து வரும் இந்தப் பிரச்னைக்கு முகநூல் நிறுவனம் தற்போது தீர்வு கண்டுள்ளது. "புரொஃபைல் லாக்' எனும் புதிய சேவையை அந்த நிறுவனம் அறிமுகம் செய்துள்ளது. புரொஃபைலை லாக் செய்துவிட்டால், நண்பர்கள் மட்டுமே உங்கள் விவரங்களைக் காண முடியும். உங்கள் சிறிய அளவிலான புரொஃபைல் போட்டோவை மட்டுமே பிறர் பார்க்க முடியும். அதைப் பதிவிறக்கம் செய்யவோ, ஜூம் செய்தோ காண முடியாது. உங்களது போட்டோக்களையும், விவரங்களையும் வெளியாட்களால் காண இயலாது. ஆனால், அவர்கள் உங்களை டேக் செய்து பதிவிடலாம்.

புரொஃபைல் லாக் செய்ய, முகநூலில் உங்கள் பெயருக்கு கீழே உள்ள "லாக் புரொஃபைல்' என்பதைக் கிளிக் செய்து மீண்டும் உறுதி செய்தால் போதும். எனினும், இந்த லாக்கை விடுவித்தால்தான் உங்களுடையே பதிவுகளை பொது வெளியில் காண முடியும். புரொஃபைல் லாக்கை மீண்டும் கிளிக் செய்து விடுவிப்பதும் எளிதானதுதான்.

இந்தச் சேவையை அனைவரும் பயன்படுத்தி கொள்ளலாம். அறிமுகம் இல்லாதவர்களிடம் இருந்து இந்த புதிய சேவையைப் பாதுகாக்க உதவினாலும், நண்பர்களைப் போல நடிப்பவர்களை நாம்தான் அடையாளம் கண்டு எச்சரிக்கையாக இருக்க வேண்டும்.