புதிய வீடு

 நாலு பெரிய குச்சி நட்டு
 தூண்களாக நிறுத்துவேன்
 சின்னச் சின்ன குச்சி எடுத்து
 குறுக்கும் நெடுக்கும் பரப்புவேன்
 
 அதற்கும் மேலே ஓலை போட்டு
 கூரையாகப் பொருத்துவேன்
 அட்டைப் பெட்டித் துண்டை நறுக்கி
 சுவர்களாக நிறுத்துவேன்
 
 வத்திப் பெட்டி அட்டை யாலே
 கதவுசெய்து மாட்டுவேன்
 வாசலுக்குப் படிக் கட்டாக
 ஓட்டாஞ்சில்லை அடுக்குவேன்
 
 இதோ எங்கள் புதிய வீடு
 விருப்பம் உள்ளவர் பார்க்கலாம்
 தேவை என்றால் உங்களோடு
 எடுத்துக் கொண்டு போகலாம்
 
 புதிய வீடு கட்டுவதற்கு
 கால்மணி நேரம் ஆகுமே
 வேண்டாம் என்றால் இடித்துத் தள்ள
 கால்நொடி நேரம் போதுமே!