தீபாவளித் திருநாள்!

 தீமைகள் அகன்ற ஒருநாளாம் - அது
 "தீபா வளி'யெனும் திருநாளாம்!
 
 எண்ணெய் தேய்த்துக் குளித்திடுவார் - அன்று
 யாவரும் சேர்ந்தே களித்திடுவார்!
 
 ஆடைகள் புதிதாய் அணிந்திடுவார் - கூடி
 அவரவர் தெய்வத்தைப் பணிந்திடுவார்!
 
 சுவையாய் உணவுகள் உண்டிடுவார் - தங்கள்
 சுற்றம் நட்பையும் கண்டிடுவார்!
 
 செய்திகள் அனுப்பி வாழ்த்திடுவார் - நல்ல
 செயலால் மகிழ்ச்சியில் ஆழ்த்திடுவார்!
 
 வீடுகள், தெருக்களில் வெடியோசை - எங்கும்
 பெரியவர், சிறியவர் கரஓசை!
 
 ஒற்றுமை, அன்பை முன்னோர்கள் - இன்று
 கற்றுக் கொள்ளவே சொன்னார்கள்!
 
 உணவும், உடையும், இருப்பிடமும் - இதுபோல்
 தினமும் கிடைத்திட வழிகாண்போம்!
 
 இருளை வாழ்வில் விரட்டிடுவோம் -நல்ல
 பொருளை உழைத்தே திரட்டிடுவோம்!
 
 வருடம் தோறும் வரவேண்டும் - இந்நாள்
 வாழ்வில் நலங்கள் தரவேண்டும்.