தொலைக்காட்சி

எத்தனை நேரம் சிலையாக

எனக்கு முன்னால் அமர்ந்திருப்பாய்?

காலம் போனால் வந்திடுமா?

கருத்தை அழித்தால் நலம் வருமா?

எத்தனை தொடர்கள் பார்க்கின்றாய்

எவ்வகை நன்மை நீ பெற்றாய்?

புத்தனை மாற்றிய போதிமரம்

என்றா என்னை நினைத்துவிட்டாய்?

படிக்கும் நேரம் பாழாக

பலமணி நேரம் வீணாக

நடிப்பைப் பார்த்து துடிக்கின்றாய்

நாளும் கண்ணீர் வடிக்கின்றாய்

விலங்கு பறவை வாழ்க்கையெல்லாம்

விந்தை மிகுந்தவை; பார்த்திடலாம்!

அறவியல் செய்த விந்தை பல

அவற்றைப் பார்த்தால் பல நன்மை!

உயிரைப் போன்றது மணித்துளியே - இதை

உணரா திருந்தால் என்ன பயன்?

பயிரைக் காக்கும் உழவன் போல்

பாங்காய் அதை நீ காத்திடுவாய்!

எத்தனை தேவை உனக்குண்டு - அவை

எப்படி உன்னைத் தேடி வரும்?

சிந்தனை செய்து உயர்ந்து விடு

தினமும் கடமைகள் ஆற்றிவிடு!