பாப்பா பாட்டு தரும் சேதி!

முறுக்கிய மீசை! சுடர் ஒளிர் விழிகள்!
முண்டாசுக் கவி நம் பாரதி - பயந்து 
ஒடுங்கிய பாரதர் உரிமைக் குரலை
உரத்துப் பாடிய மாகவி!

தாய்மொழிப் பற்றும்,  தாய்நாட்டன்பும்
இரண்டும் இரண்டு விழிகளாம்! - வெறும்வாய்ப் 
பேச்சு, பொய், ஜாலம், நடிப்பின்றி 
வாழ்நாள் முழுதும் ஒழுகினார்!

பூனைக் கதையைப் புரியும் விதமாய்ப் 
பாப்பாப் பாட்டில் பாடினார்! - தன்
மானம், ஒற்றுமை மிகுந்த சகோதரர் 
நாம்! என மனதில் உணர்த்தினார்!

சொல்லில் உயர்வு தமிழ்ச்சொல் எனப்
பிஞ்சுகள் மனதில் தூவினார்! - மறை
வள்ளுவர், கம்பர், இளங்கோ போலவே 
மாகவி  எவர்?... என வினவினார்!

காலையில் எழுதல், கற்றல், பாட்டென
சிறுவர்கள் செவிகளில் ஓதினார்! - அந்தி 
மாலைப் பொழுதில் ஓட்டமும், ஆட்டமும்
உடலுக்கு உறுதி எனக் கூறினார்!

தேசம், மக்கள், மொழிமேற் பற்றிவை 
தெய்வபக்தியின் மேலதாம்!- எனும் 
நேசம் எல்லோர்க்கும் வேண்டும் நிச்சயம்! - இது
பாப்பாப் பாட்டின் சேதியாம்!