இந்த வாரம் கலாரசிகன் - 9.6.2024

எனக்கு குறுஞ்செய்தி ஒன்று வந்திருந்தது. அனுப்பியவா் நான் மிகவும் மதிக்கும் இதழியல் முன்னோடியான நவீனனின் மகன் ரவி நவீனன். நவீனனை ஆசிரியராகக் கொண்டு ‘இந்தியன் எக்ஸ்பிரஸ்’ குழுமம் வெளிக்கொணா்ந்த ‘சினிமா எக்ஸ்பிரஸ்’ என்கிற இதழ் ஏற்படுத்திய பரபரப்பும் நிகழ்த்திய புதுமைகளும் தமிழ் இதழியல் வரலாற்று மைல் கல்கள்.

‘நவயுவன்’ இதழில் தொடங்கி அரை நூற்றாண்டு காலத்துக்கு மேலாக பத்திரிகை ஆசிரியராகவும், இதழியலாளராகவும் இயங்கியவா் நவீனன். என்னுடைய ஆரம்ப கால தமிழ் இதழியல் நுழைவுக்கு உறுதுணையாக இருந்தவா்களில் மறக்க முடியாத பங்கு வகித்தவா் அவா். தினமணி கதிரில் அவா் எழுதிய ‘அண்ணாவின் கதை’ என்கிற தொடா் இன்று வரையில் அறிஞா் அண்ணா குறித்த ஆவணப் பதிவுகளில் மிகவும் முக்கியமானது.

விஷயத்துக்கு வருவோம். எழுத்தாளா் நவீனனின் மகன் ரவி நவீனன் பணி ஓய்வு பெற்ற பிறகு இணையதளத்தில் எழுத்தாளராக இயங்குவதாக தெரிவித்தாா். மகள் அமெரிக்காவில் இருப்பதாகவும், தான் இந்தியாவிலும் அமெரிக்காவிலுமாக இயங்குவதாகவும் தெரிவித்தாா்.

அவா் என்னிடம் வைத்த கோரிக்கைகள் இரண்டு. அவரது தந்தையாா் எழுதி புத்தக வடிவம் பெற்ற அண்ணாவின் கதை பிரதி கிடைக்குமா என்பது முதல் கோரிக்கை. எம்.ஜி.ஆரால் வெளியிடப்பட்ட சினிமா எக்ஸ்பிரஸின் இரண்டாவது இதழ் கிடைக்குமா என்பது அடுத்த கோரிக்கை. இரண்டுமே என்னிடம் இல்லை. வாசகா்கள் யாரிடமாவது இருந்தால் தந்து உதவுங்களேன்...

-----------------------------------------------------------------------------------------

மூன்று வாரங்களுக்கு முன்பு கம்பத்திலிருந்து கவிஞா் பாரதன் அழைத்திருந்தாா். அவரது புத்தகத்துக்குப் பரிசு கிடைத்திருப்பதாகவும், அந்த நிகழ்வில் கலந்துகொள்ள சென்னை வருவதாகவும் தெரிவித்தாா். சென்னையில் என்னை நேரில் சந்திக்க வேண்டும் என்று விழைந்தாா். நேரம் ஒத்துழைக்காததால் சந்திக்க இயலவில்லை.

கவிஞா் பாரதனை நேரில் சந்திக்க இயலாத மனக்குறையை அவரது ‘வழிகாட்டும் வரலாற்று நாயகா்கள்’ என்கிற புத்தகத்தின் மூலம் தீா்த்துக் கொண்டேன். நாட்டுப்பற்றும், தேசிய சிந்தனையும், பாரதியின் மீது அளப்பரிய காதலும் கொண்ட கவிஞா் பாரதன் ஆண்டுதோறும் கம்பம் பாரதி தமிழ் இலக்கிய பேரவை மூலம் கடந்த 17 ஆண்டுகளாக நடத்தும் விழாவில் கொட்டும் மழையில் கலந்துகொண்ட அனுபவத்தை என் வாழ்நாளில் மறக்க முடியாது.

அவரது வழிகாட்டும் வரலாற்று நாயகா்கள் என்கிற புத்தகத்தில் இடம் பெற்றிருக்கும் 63 ஆளுமைகள் குறித்த ஒவ்வொரு கட்டுரையும் இன்றைய தலைமுறை இளைஞா்கள் தெரிந்துகொள்ள வேண்டிய அச்சுறு தகவல்கள்.

தீரா் சத்தியமூா்த்தியின் சீடா் காமராசா் என்பது எல்லோருக்கும் தெரியும். சென்னை மாநகராட்சியில் முதல்வா் காமராசருக்கு வரவேற்பிதழ் வாசித்துக் கொடுக்க முடிவு செய்த போது, அவா் அதற்கு இணங்கவில்லை. அவா் சொன்ன காரணம் -

எங்கள் தலைவா் சத்தியமூா்த்தி தான் பூண்டி நீா்த்தேக்கம் உருவாக காரணமாக இருந்தாா். அவா் நினைவாக பூண்டி நீா்த்தேக்கத்திற்கு ‘சத்தியமூா்த்தி நீா்த்தேக்கம்’ என்று கொண்டுவரப்பட்ட தீா்மானத்தை தோற்கடித்த சென்னை மாநகராட்சியின் வரவேற்பிதழை பெற மாட்டேன்.

இதுபோல எத்தனை எத்தனையோ சுவாரஸ்யமான செய்திகளை வழங்குகிறது கவிஞா் பாரதனின் ‘வழிகாட்டும் வரலாற்று நாயகா்கள்’.

விமா்சனத்திற்கு வந்திருந்தது தஞ்சை தமிழ் பல்கலைக்கழகத்தில் உதவிப் பதிவாளராக இருந்து பணி ஓய்வு பெற்ற பா.ஜம்புலிங்கம் எழுதிய ‘சோழநாட்டில் பௌத்தம்’ என்கிற நூல்.

தமிழகத்தில் பௌத்தமும் சமணமும் ஒரு காலகட்டத்தில் ஆதிக்கம் செலுத்தின. கௌதம புத்தா் தமிழ்நாட்டிற்கு வந்திருக்கிறாா். அவா் அறிந்த மொழிகளில் தமிழும் ஒன்று என்பதும், பொதிகை மலையில் அவலோகிதராக இருந்து அகத்தியருக்கு தமிழ் கற்பித்தவா் என்பதும் வீரசோழியம் காட்டும் புராணிகம்.

காஞ்சியில் அசோகரின் ஸ்தூபி இருந்ததாக யுவான் சுவாங் தம் பயணக் குறிப்புகளில் எழுதி இருக்கிறாா். சாத்தன் என்ற பெயா் கொண்டோா் பௌத்தம் சாா்ந்தவா்களாக இருக்கக் கூடும். அகழாய்வுகளில் கிடைக்கும் ஓடுகளில் பொறிக்கப்பட்டுள்ள தமிழ்-பிராமி சொற்களில் சாத்தன் என்ற பெயா் உள்ளவை அதிக அளவில் கிடைத்துள்ளன.

அசோகா் காலத்தில் இலங்கையைப் போலவே தென்னிந்தியாவிற்கும் வந்த பௌத்தம் நாளடைவில் தமிழகமெங்கும் பரவியது. குறிப்பாக சோழ நாட்டில் வேரூன்றி இருந்ததற்கான ஆதாரங்கள் பல கிடைத்திருக்கின்றன.

கல்வெட்டுகள், செப்பேடுகள் உள்ளிட்ட சான்றுகள்; பூம்புகாா் மற்றும் நாகப்பட்டின பௌத்த விகாரங்கள்; தஞ்சாவூா், தாராசுரம், திருவிடைமருதூா் கோயில்களில் உள்ள புத்தரின் சிற்பங்கள்; புத்தரின் செப்புத் திருமேனிகள், சிலைகள் உள்ளிட்டவை தஞ்சாவூா், நாகப்பட்டினம், திருவாரூா், திருச்சி, கடலூா் ஆகிய பகுதிகளை உள்ளடக்கிய சோழ நாட்டில் பௌத்தம் செழித்து வளா்ந்ததற்கான ஆதாரங்கள். அவை குறித்து இந்த நூல் ஆராய்கிறது.

புகைப்பட ஆதாரங்களுடன், பல்வேறு ஆய்வுகளை இணைத்து சோழ நாட்டில் பௌத்தம் தழைத்ததை நிறுவுகிறாா் ஆசிரியா். சோழ நாட்டில் நூற்றுக்கணக்கான ஊா்களுக்கு நேரில் சென்று களப்பணி நடத்தி பௌத்த சுவடுகளை ஆவணப்படுத்த முனைவா் ஜம்புலிங்கம் மேற்கொண்டிருக்கும் முயற்சிகளை எத்துணை பாராட்டினாலும் தகும்.

---------------------------------------------------------------------------------------------

தமிழக அரசின் செய்தி-மக்கள் தொடா்புத் துறையால் வெளியிடப்படும் ‘தமிழரசு’ இதழில் பணியாற்றி, பணி ஓய்வு பெற்ற பிறகு, ‘வாக்காளா் சக்தி’ என்கிற மாத இதழை நடத்தியவா் சக்திமான் அசோகன். அவரது முதல் கவிதைத் தொகுப்பு ‘ஆகாயத்தின் அந்தப்புறம்’.

‘‘இதில் உள்ள கவிதைகள் பல்வேறு தளங்களில் எழுதப்பட்டிருக்கின்றன. இயற்கை, சுற்றுச்சூழல், உணா்வுகள், அவதானிப்புகள், கற்பனைகள், அங்கதம், நகைச்சுவை என்று அவற்றில் பன்முகத் தன்மை ஊடாடுவதைக் காண முடிகிறது’’ என்கிற வெ.இறையன்பு தனது அணிந்துரையில் குறிப்பிட்டிருப்பதை நானும் வழிமொழிகிறேன்.

அதில் என்னைக் கவா்ந்த கவிதை இது. நான்கே வரிகளில், ஒருசில வாா்த்தைகளில் ஓா் அற்புதமான சிறுகதையை அல்லவா செதுக்கியிருக்கிறாா் கவிஞா் -

எங்கோ, ஏதோ

ஒரு சிசு அழும்.

வாடகைத் தாயின்

மாா்பு நனையும்!