நரக வேதனை தரும் தீவினை

அச்சம் பெரிதால்; அதற்கின்பம் சிற்றளவால்;

நிச்சம் நினையுங்கால் கோக்கொலையால்;} நிச்சலும்

கும்பிக்கே கூர்த்த வினையால்; பிறன்தாரம்

நம்பற்க, நாணுடையார்!

(பாடல் 81 அதிகாரம்: பிறர்மனை நயவாமை)

பிறருடைய மனைவியரை விரும்பி, எழுகின்ற காலத்திலே தம்முள் தோன்றுகின்ற அச்சமோ மிகவும் பெரிதாகும். அந்தப் பேரச்சத்திற்குக் கைம்மாறாகக் கிடைக்கும் இன்பமோ மிகவும் சிறிதளவினதே. அந்த ஒழுக்கத்தின் உண்மையான நிலையினை ஆராய்ந்து பார்க்குமிடத்து, அரசனாற் கொலை செய்யப்படுதலும் நேர்வதாகும். எந்நாளும் நரக வேதனையை அடைதற்குரிய மிகுந்த தீவினையும் அதுவாகும். அதனால், நாணம் உடையவர் எவருமே அயலானது மனைவியை விரும்பாதிருக்கக் கடவர்.