பாகிஸ்தானை பலவீனப்படுத்துவதே இந்தியாவின் நோக்கம்

வாஷிங்டன்,அக்.8: பாகிஸ்தானை பலவீனப்படுத்துவதன் மூலம் பாகிஸ்தான் மீது ஆதிக்கம் செலுத்த முடியும் என்று இந்தியா கருதுகிறது. ஆப்கானிஸ்தானில் இந்தியா மேற்கொள்ளும் வளர்ச்சித் திட்டங்கள் பாகிஸ்தானுக்கு எதிராகவே உள்ளது என்று பாகிஸ்தான் முன்னாள் அதிபர் பர்வேஸ் முஷாரப் இந்தியா மீது குற்றம் சாட்டியுள்ளார்.

இது குறித்து அவர் மேலும் கூறியதாவது:

பாகிஸ்தானிற்கு எதிரான செயல்பாடுகளை மேற்கொள்வதன் மூலம் பாகிஸ்தான் மீது ஆதிக்கம் செலுத்தலாம் என்று கருதும் இந்தியாவின் எண்ணம் ஒரு போதும் ஈடேறாது.

அண்டை நாடுகளின் மீது ஆதிக்கம் செலுத்தக் கூடிய வகையினில் இந்தியாவினுடைய வெளிநாட்டுக் கொள்கை,பொருளாதாரக் கொள்கைகள் அமைந்துள்ளன. பாகிஸ்தானை பலவீனப்படுத்துவதன் மூலம் பாகிஸ்தானின் தாக்கும் திறன் குறையும் என்று இந்தியா கருதுகிறது.

ஆப்கானிஸ்தானில் இந்தியா மேற்கொள்ளும் வளர்ச்சி திட்டப் பணிகளை அமெரிக்கா தலையிட்டு நிறுத்த வேண்டும். ஆப்கானிஸ்தான் ராணுவ வீரர்களுக்கு இந்தியாவில் பயிற்சி தரப்படுகிறது. இதன் மூலம் ஆப்கானிஸ்தானையும் பாகிஸ்தானுக்கு எதிராக திருப்பலாம் என்று இந்தியா கருதுகிறது.

பாகிஸ்தானுடைய நிலைமையை அமெரிக்கா கருத்தில் கொண்டு இந்தியாவின் இத்தகைய செயல்பாடுகளை தடுக்க வேண்டும். இரு நாட்டினுடைய சுதந்திரத்திற்குப் பிறகு இரு நாடுகளுக்கிடையே பல்வேறு சண்டைகளும், குழப்பங்களும் நீடித்தவாறே உள்ளன. இவை கண்டிப்பாக தீர்க்கப்பட வேண்டும் என்று அவர் தெரிவித்தார்.