அமெரிக்க நிதியமைச்சராக ஜாக் லியூ பதவியேற்பு

அமெரிக்க நிதியமைச்சராக ஜாக் லியூ பதவியேற்றார்.

இந்நிகழ்ச்சிக்கு அதிபர் பராக் ஒபாமா முன்னிலை வகித்தார். ஜாக் லியூவுக்கு (57) துணை அதிபர் ஜோ பிடேன் பதவிப் பிரமாணம் செய்து வைத்தார்.

நிதியமைச்சராக ஜாக் லியூவை நியமிப்பது தொடர்பாக செனட் அவையில் வாக்குப் பதிவு நடைபெற்றது. அதில் ஜாக் லியூவுக்கு ஆதரவாக 71 வாக்குகளும், எதிராக 26 வாக்குகளும் கிடைத்தன.

இதற்கு முன் அதிபரின் உதவிச் செயலாளர், பட்ஜெட் மேலாண்மை அலுவலக இயக்குநர் உள்பட முக்கிய பதவிகளை ஜாக் லியூ வகித்துள்ளார்.

முன்னதாக ஜாக் லியூவை இப்பதவிக்கு நியமிப்பதாக அறிவித்து ஒபாமா செய்தியாளர்களிடையே பேசும்போது, ""நிதி மேலாண்மையில் அவருக்குள்ள திறமையும், அனைத்துக் கட்சித் தலைவர்களுடனும் இணக்கமாக செயல்படக் கூடிய அவரின் குணமும்தான் அவரை இப்பதவியில் நியமிப்பதற்கு காரணம். நிதி விவகாரத்தில் அவரின் ஆலோசனையின்படி தொடர்ந்து செயல்படுவேன்'' என்றார்.