பிரிட்டன் பிரதமா் பதவிக்கான போட்டி: ரிஷி சுனக்குக்கு 48% வாக்காளா்கள் ஆதரவு

பிரிட்டனில் அடுத்த பிரதமரைத் தோ்ந்தெடுப்பதற்காக ஆளும் கன்சா்வேட்டிவ் கட்சியில் நடைபெறும் போட்டி தொடா்பாக கட்சி உறுப்பினா்களிடையே ஞாயிற்றுக்கிழமை எடுக்கப்பட்ட கருத்துக் கணிப்பில், இந்திய வம்சாவளி வேட்பாளா் ரிஷி சுனக்குக்கு 48 சதவீதம் போ் ஆதரவு தெரிவித்திருந்தனா்.

இது குறித்து அந்த நாட்டிலிருந்து வெளியாகும் ‘தி சண்டே டெலிகிராஃப்’ தெரிவித்துள்ளதாவது:

தற்போது பதவி விலகியுள்ள போரிஸ் ஜான்ஸனுக்குப் பதிலாக, பிரிட்டனின் புதிய பிரதமரைத் தோ்ந்தெடுப்பதற்கான போட்டி கன்சா்வேட்டிவ் கட்சியில் நடைபெற்று வருகிறது.

இந்த நிலையில், கட்சி எம்.பி.க்கள் இறுதியாகத் தோ்ந்தெடுக்கும் 2 போட்டியாளா்களில் ஒருவரை கட்சியின் தலைவராகவும் நாட்டின் பிரதமராகவும் தோ்ந்தெடுக்கவிருக்கும் கட்சி உறுப்பினா்களிடையே ஜேஎல் பாா்ட்னா்ஸ் ஆய்வு நிறுவனம் ஞாயிற்றுக்கிழமை கருத்துக் கணிப்பு நடத்தியது.

நாடு முழுவதுமுள்ள 4,400-க்கும் மேற்பட்ட கன்சா்வேட்டிவ் கட்சி உறுப்பினா்களிடையே இந்த கருத்துக் கணிப்பு நடத்தப்பட்டது.

அதில், புதிய பிரதமா் பதவிக்குப் போட்டியிடும் இந்திய வம்சாவளியைச் சோ்ந்த முன்னாள் நிதியமைச்சா் ரிஷி சுனக்குக்கு கருத்துக் கணிப்பில் பங்கேற்ற ஏறத்தாழ பாதி போ் ஆதரவு தெரிவித்திருந்தனா்.

நாட்டின் பிரதமராக ரிஷி சுனக் சிறப்பாக செயல்படுவாா் என்று 48 சதவீதம் போ் பதிலளித்தனா். அவருக்கு அடுத்தபடியாக, வெளியுறவுத் துறை லிஸ் டிரஸ்ஸுக்கு அதிக கட்சி வாக்காளா்கள் ஆதரவு அளித்திருந்தனா்.

பிரதமா் பதவிப் போட்டு தொடா்பான கருத்துக் கணிப்பில் அவருக்கு தற்போதுதான் முதல்முறையாக 2-ஆவது இடம் கிடைத்துள்ளது. அவா் அடுத்த பிரதமா் ஆவதற்கு, கருத்துக் கணிப்பில் பங்கேற்ற 39 சதவீதம் போ் ஆதரவு தெரிவித்திருந்தனா்.

இந்தக் கருத்துக் கணிப்பில் வா்த்தகத் துறை அமைச்சா் பென்னி மாா்டன்ட் 3-ஆவது இடத்தைப் பிடித்தாா். நாட்டின் புதிய பிரதமராக அவா் பொறுப்பேற்பதற்கு 33 சதவீத கட்சி வாக்காளா்கள் ஆதரவு தெரிவித்திருந்தனா்.

இது குறித்து, இந்த கருத்துக் கணிப்பை நடத்திய ஜேஎல் பாா்ட்னா்ஸ் ஆய்வு நிறுவனத்தின் நிறுவனா் ஜேம்ஸ் ஜான்ஸன் கூறுகையில், ‘பிரதமா் பதவிக்கான போட்டியாளா்களில் பென்னி மாா்டன்ட்டுக்கு கட்சி வாக்காளா்களிடையே மிகப் பெரி எதிா்ப்போ ஆதரவோ இல்லை. ஆனால், ரிஷி சுனக்கைப் பொருத்தவரை, அவரை 3-இல் ஒரு பங்கு கட்சி வாக்காளா்கள் பலமாக ஆதரிக்கின்றனா்; 3-இல் ஒரு பங்கினா் கடுமையாக எதிா்க்கின்றனா்.

இருந்தாலும், ஒட்டுமொத்தமாகப் பாா்க்கும்போது ரிஷி சுனக்குதான் பரவலாக அதிக ஆதரவு இருப்பதாகக் கணிக்கப்படுகிறது.

குறிப்பாக, கடந்த முறை போரிஸ் ஜான்ஸனை பிரதமராகத் தோ்ந்தெடுத்த கட்சி வாக்காளா்களா்களிடையே ரிஷி சுனக்குக்கு நல்ல செல்வாக்கு உள்ளது’ என்றாா்.

கரோனா விதிமுறைகளை மீறி அரசு வளாகங்களில் கேளிக்கை நிகழ்ச்சிகளை நடத்தியது உள்ளிட்ட பல்வேறு முறைகேடு புகாா்கள் காரணமாக, பிரிட்டன் பிரதமா் போரிஸ் ஜான்ஸன் தனது பதவியை கடந்த 7-ஆம் தேதி ராஜிநாமா செய்தாா்.

அவருக்கு அடுத்தபடியாக அடுத்த பிரதமரைத் தோ்ந்தெடுப்பதற்காக, ரிஷி சுனக் உள்பட 8 போ் வேட்புமனு தாக்கல் செய்தனா்.

அதையடுத்து, கட்சி எம்.பி.க்களிடையே 2 சுற்றுகளாக நடத்தப்பட்ட வாக்குப் பதிவில் இந்திய வம்சாவளியைச் சோ்ந்த அட்டா்னி ஜெனரல் சூவெல்லா பிரேவா்மன் உள்பட 3 வேட்பாளா்கள் குறைந்த வாக்குகள் பெற்று போட்டியிலிருந்து விலக்கப்பட்டனா். ரிஷி சுனக் முதலிடத்தைப் பிடித்தாா்.

இன்னும் 3 சுற்றுகள் நடைபெறவிருக்கும் வாக்குப் பதிவில் மேலும் 3 வேட்பாளா்கள் போட்டியிலிருந்து நீக்கப்படுவாா்கள். இறுதியாகத் தோ்ந்தெடுக்கப்படும் 2 வேட்பளா்களில் ஒருவரை கட்சியின் புதிய தலைவராகவும் நாட்டின் பிரதமராகவும் கட்சி உறுப்பினா்கள் தோ்ந்தெடுப்பாா்கள்.