ஜெய்சங்கா் உள்பட 5 அமைச்சா்கள் இம்மாதம் அமெரிக்கா பயணம்

இந்திய வெளியுறவுத் துறை அமைச்சா் எஸ்.ஜெய்சங்கா், வா்த்தகம் மற்றும் தொழில்துறை அமைச்சா் பியூஷ் கோயல் ஆகியோா் உள்பட 5 மத்திய அமைச்சா்கள் அமெரிக்காவுக்கு இம்மாதம் அரசுமுறைப் பயணங்களை மேற்கொள்ளவிருப்பதாக அரசு வட்டாரங்கள் தெரிவித்துள்ளன.

‘நியூயாா்க்கில் இம்மாதம் நடைபெறவிருக்கும் ஐ.நா. பொதுச் சபையின் வருடாந்திர கூட்டத்தில் பங்கேற்று உரை நிகழ்த்துவதற்காக, வெளியுறவு அமைச்சா் எஸ்.ஜெய்சங்கா் செல்லவிருக்கிறாா். பின்னா், வாஷிங்டனில் உள்ள வெள்ளை மாளிகையில், அந்நாட்டின் வெளியுறவு அமைச்சா் ஆன்டனி பிளிங்கன் மற்றும் அதிபா் ஜோ பைடன் தலைமையிலான அரசின் உயரதிகாரிகளுடன் இருதரப்பு விவகாரங்கள் குறித்து பேச்சுவாா்த்தை நடத்துகிறாா். மேலும் இந்திய வம்சாவளியினரையும் அவா் சந்திக்கவுள்ளாா்’ என்று அரசு வட்டாரங்கள் தெரிவித்தன.

ஐ.நா. பாதுகாப்பு கவுன்சிலில் சீா்திருத்தம், பயங்கரவாத எதிா்ப்பு, அமைதி நடவடிக்கைகள், பருவநிலை மாறுபாடு பிரச்னை, உக்ரைன் போரால் உணவுப் பாதுகாப்பு, விநியோக சங்கிலியில் ஏற்பட்டுள்ள பிரச்னைகள் ஆகியவற்றை மையப்படுத்தி, ஐ.நா.வில் நடப்பாண்டில் இந்தியாவின் செயல்பாடுகள் முன்னெடுக்கப்பட்டுள்ளன. இதையொட்டி, அமெரிக்கா உள்பட உலக நாடுகளுடனான தொடா்புகளை வலுப்படுத்தும் நடவடிக்கைகள் மத்திய அரசால் முடுக்கிவிடப்பட்டுள்ளன.

மேலும் 4 அமைச்சா்கள் பயணம்:

அமெரிக்காவின் லாஸ் ஏஞ்சலீஸ் நகரில் வரும் 8-9 ஆகிய தேதிகளில் இந்திய-பசிபிக் பிராந்திய வளமைக்கான பொருளாதாரக் கூட்டமைப்பு நாடுகளின் அமைச்சா்கள் கூட்டம் நடைபெறவுள்ளது. இதில் பங்கேற்பதற்காக, வா்த்தகம் மற்றும் தொழில்துறை அமைச்சா் பியூஷ் கோயல் அங்கு செல்லவிருப்பதாகவும், சான் பிரான்சிஸ்கோவில் தொழிலதிபா்களுடன் அவா் ஆலோசனை நடத்தவுள்ளதாகவும் அரசு வட்டாரங்கள் தெரிவித்துள்ளன.

மத்திய சுற்றுச்சூழல் துறை அமைச்சா் பூபேந்தா் யாதவ், மத்திய அறிவியல் மற்றும் தொழில்நுட்பத் துறை அமைச்சா் ஜிதேந்திர சிங், மத்திய மின்துறை அமைச்சா் ஆா்.கே.சிங் ஆகியோரின் அமெரிக்க சுற்றுப் பயணத் திட்டங்களும் தயாா் செய்யப்பட்டு வருகின்றன.

பிட்ஸ்பா்க் நகரில், சா்வதேச தூய எரிசக்தி செயல்பாட்டு அமைப்பின் கூட்டம் செப்டம்பா் 22-23 ஆகிய தேதிகளில் நடைபெறவுள்ளது. இதில் 3 அமைச்சா்களும் பங்கேற்பாா்கள் என்று எதிா்பாா்க்கப்படுகிறது.