காஸா மக்கள் காற்றிலா கரைந்து போவார்கள்? : இஸ்ரேலை எச்சரிக்கும் உலக நாடுகள்

காஸாவின் தெற்கு எல்லையான ராபாவில் தரைவழி ராணுவ நடவடிக்கைகளை விரிவுப்படுத்தவுள்ள இஸ்ரேலின் முடிவு, பேரழிவையும் பின்விளைவுகளையும் ஏற்படுத்தும் என அண்டை நாடுகள் மற்றும் மத்தியஸ்தம் மேற்கொள்ளும் நாடுகள் இஸ்ரேலை எச்சரித்துள்ளன.

ராபாவில் இஸ்ரேல் மேற்கொண்ட சமீபத்திய வான்வழி தாக்குதலில் 44 பாலஸ்தீனர்கள் பலியாகினர்.

இஸ்ரேலிய பிரதமர் பெஞ்சமின் நெதன்யாகு, ராணுவம் தரைவழி தாக்குதலை ராபா நோக்கி விரிவுபடுத்த அங்குள்ள மக்களை வெளியேற்ற திட்டமிட்டுள்ளதாக தெரிவித்தார்.

முன்னர் காஸாவின் மற்ற பகுதிகளில் இருந்து லட்சக்கணக்கான மக்கள் தெற்கு நோக்கி இடம்பெயர்ந்தனர். ராபாவில் 80 சதவிகித மக்கள் தஞ்சமடைந்திருக்கும் நிலையில் இஸ்ரேலின் இந்த முடிவு மக்கள் அடுத்து எங்கு செல்வது என்கிற கேள்வியை எழுப்பியது.

எகிப்தின் எல்லை பகுதியான ராபாவிலிருந்து மக்களை இடம்பெயர கோரினால் எகிப்து நோக்கி அவர்கள் இடம்பெயரும் வாய்ப்பு உள்ளது. இது ஆபத்தான பின்விளைவுகளை ஏற்படுத்தும் எனவும் 40 ஆண்டுகளாக இஸ்ரேல்-எகிப்து இடையே நிலவிவரும் உடன்படிக்கையை மீறும் செயல் எனவும் எகிப்து தெரிவித்துள்ளது.

ஜெர்மனியின் வெளியுறவு துறை அமைச்சர் அன்னலெனா பேர்பாக்,  “காஸா மக்கள் காற்றில் கரைந்து போகமாட்டார்கள். ராபாவில் இஸ்ரேலின் நடவடிக்கைகள் மனித பேரழிவை ஏற்படுத்தும்” எனத் தெரிவித்துள்ளார்.

கத்தார், செளதி அரேபியா ஆகிய நாடுகளும் இஸ்ரேலை இது குறித்து எச்சரித்த நிலையில் மக்கள் எங்கு செல்வார்கள் என்கிற கேள்விக்கு நெதன்யாகு பதிலளித்துள்ளார்.

இஸ்ரேலிய பிரதமர் நெதன்யாகு,  “ராபாவின் வடக்கு பகுதியில் நாங்கள் துப்புரவு செய்த இடங்கள் ஏராளமாக உள்ளன. விரிவான திட்டத்திற்கு செயலாற்றி கொண்டிருக்கிறோம்” என அவர் தெரிவித்துள்ளார்.

இதையும் படிக்க: காஸா: பலி எண்ணிக்கை 28 ஆயிரத்தைக் கடந்தது

காஸாவில் பலி எண்ணிக்கை 28 ஆயிரத்தைக் கடந்துள்ளது. ராபாவில் நாள்தோறும் இஸ்ரேல் படைகள் தாக்குதல் மேற்கொண்டு வருகின்றன.