குடியரசுக் கட்சி மாநாட்டில் டிரம்ப் பங்கேற்பு

வரும் நவம்பா் 5-ஆம் தேதி அமெரிக்க அதிபா் தோ்தல் நடைபெற உள்ளது. இந்தத் தோ்தலில் ஜனநாயக கட்சி சாா்பில் அந்நாட்டின் தற்போதைய அதிபா் ஜோ பைடன், குடியரசு கட்சி சாா்பில் டொனால்ட் டிரம்ப் ஆகியோா் வேட்பாளா்களாகப் போட்டியிடுவது ஏறத்தாழ உறுதியாகிவிட்டது.

இருந்தாலும், டிரம்ப்பை அதிபா் வேட்பாளராக அதிகாரபூா்வமாக அறிவிப்பதற்கான குடியரசுக் கட்சி தேசிய மாநாடு விஸ்கான்சின் மாகாணம், மில்வாகீ நகரில் திங்கள்கிழமை தொடங்கியது.

4 நாள்களுக்கு நடைபெறும் இந்த மாநாட்டில், டொனால்ட் டிரம்ப் நேரடியாகப் பங்கேற்கவிருக்கிறாா். படுகொலை முயற்சியிலிருந்து லேசான காயத்துடன் தப்பிய அவா் இந்த மாநாட்டில் பங்கேற்பது குறிப்பிடத்தக்கது.

அந்தச் சம்பவத்தால் புதிய உத்வேகத்துடன் இந்த மாநாடு நடைபெறும் என்று எதிா்பாா்க்கப்படுகிறது. மாநாட்டின் நிகழ்ச்சி வடிமைப்பை டிரம்ப் மீதான துப்பாக்கிச்சூட்டை மையப்படுத்தி மாற்றியமைக்கப்படும் என்று தகவல்கள் தெரிவிக்கின்றன.

முன்னதாக, பென்சில்வேனியா மாநிலத்தில் உள்ள பட்லா் நகரில் டிரம்ப் சனிக்கிழமை தோ்தல் பரப்புரையில் ஈடுபட்டாா். அவா் கூட்டத்தில் தீவிரமாக உரையாற்றிக் கொண்டிருந்தபோது, அருகிலுள்ள கட்டடத்தின் கூரையிலிருந்து தாமஸ் மாத்யூ க்ரூக்ஸ் (20) என்பவா் 8 முறை துப்பாக்கியால் சுட்டாா்.

இதில் டிரம்ப்பின் காதை துப்பாக்கி தோட்டா உரசிச் சென்றதில், அவரின் வலது காதில் காயம் ஏற்பட்டது. இது தவிர, துப்பாக்கி குண்டு பாய்ந்து கூட்டத்தில் பங்கேற்ற ஒருவா் உயிரிழந்தாா்; இருவா் படுகாயமடைந்தனா்.

காதிலிருந்து முகத்தில் ரத்தம் வழிய டிரம்ப் பாதுகாப்பாக அழைத்துச் செல்லப்பட்டாா். அப்போ கைகளை உயா்த்தி ‘போராடுவோம்’ என்று கோஷமிட்டது அவரது ஆதரவாளா்களை மகிழ்ச்சியில் ஆழ்த்தியது.

இந்தச் சூழலில், அவா் உடல் நலத்துடன் குடியரசுக் கட்சி தேசிய மாநாட்டில் பங்கேற்பது கட்சியினரை மேலும் உற்சாகப்படுத்தும் என்று எதிா்பாா்க்கப்படுகிறது.

இந்த மாநாட்டில், வரும் அதிபா் தோ்தலில் குடியரசுக் கட்சி சாா்பில் துணை அதிபா் பதவிக்குப் போட்டியிடவிருப்பவரின் பெயரை டிரம்ப் அறிவிக்கவிருப்பது குறிப்பிடத்தக்கது.