தாய்லாந்தில் பயிற்சி பெற்று திரும்பிய யானைப் பாகன்களுக்கு சான்றிதழ்

யானைகளை பராமரிப்பது  குறித்து தாய்லாந்தில் பயிற்சி பெற்று திரும்பிய வண்டலூா் பூங்காவை சோ்ந்த யானைப் பாகன்களுக்கு தமிழக வனத் துறை அமைச்சா் ஆா்.எஸ்.ராஜகண்ணப்பன் புதன்கிழமை சான்றிதழ்களை வழங்கி பாராட்டு தெரிவித்தாா்.

தமிழக வனத் துறை சாா்பில் வண்டலூா் உயிரியல் பூங்காவில் பணிபுரியும் 15 யானைப் பாகன்களுக்கு தாய்லாந்தின் லாம்பாங் பகுதியில் உள்ள யானை பாதுகாப்பு மையத்தில் கடந்த ஜூன் 17 முதல் ஜூன் 21 வரை யானைகள் பராமரிப்பு குறித்து சிறப்பு பயிற்சி வழங்கப்பட்டது. இதில், யானைகளை அறிவியல் ரீதியாக கையாள்வது, அவற்றுக்கு பயிற்சி அளிப்பது, குளிக்க வைப்பது, யானைகளுக்கான சத்தான உணவுகளை தயாரிப்பது மற்றும் யானைகளை கட்டுப்படுத்துவது உள்ளிட்ட பயிற்சிகள் வழங்கப்பட்டன. மேலும், நோயுற்ற யானைகள் மற்றும் புதிதாக பிறந்த குட்டி யானைகளுக்கு தேவையான மருத்துவ சிகிச்சைகள் குறித்தும் பயிற்சிகள் வழங்கப்பட்டன.

இந்த பயிற்சியை முடித்து சென்னை திரும்பிய வண்டலூா் யானைப்பாகன்களுக்கு சான்றிதழ் வழங்கும் நிகழ்வு, வண்டலூா் அறிஞா் அண்ணா உயிரியல் பூங்காவின் பூங்கா பள்ளி அரங்கத்தில் புதன்கிழமை நடைபெற்றது. இதில் சிறப்பு அழைப்பாளராகக் கலந்து கொண்ட அமைச்சா் ஆா்.எஸ்.ராஜகண்ணப்பன், யானைப் பாகன்களுக்கு சான்றிதழ்களை வழங்கி, பாராட்டு தெரிவித்தாா்.

விலங்குகள் தாக்குவது வழக்கம்தான்: அதைத் தொடா்ந்து அமைச்சா் ஆா்.எஸ். ராஜகண்ணப்பன் செய்தியாளா்களிடம் கூறியதாவது:

வனத் துறை சாா்பில் 2-ஆவது முறையாக வண்டலூரில் பணிபுரியும் யானைப் பாகன்களுக்கு தாய்லாந்தில் பயிற்சி வழங்கப்பட்டுள்ளது. இவா்கள் அங்கு கற்றுக்கொண்ட வழிமுறைகளை பின்பற்றுவதன் மூலம் யானைகளை சிறந்த முறையில் பராமரிப்பதுடன், யானை - மனித மோதல்களை வெகுவாக கட்டுப்படுத்த முடியும். வனப்பகுதிகளில் மனிதா்களை விலங்குகள் தாக்குவது வழக்கமான ஒன்றுதான். இருப்பினும், இதுபோன்ற சம்பவங்கள் நிகழாமல் இருக்க வனத் துறை சாா்பில் தீவிர நடவடிக்கைகள்  எடுக்கப்பட்டு வருகின்றன. விலங்கு - மனித மோதல்களால் பாதிக்கப்பட்டவா்களுக்கு அரசு சாா்பில் முறையாக இழப்பீடுகள் வழங்கப்படுகின்றன என்றாா் அவா்.

இந்நிகழ்வில் தமிழக சுற்றுச்சூழல் மற்றும் வனத்துறை கூடுதல் தலைமைச் செயலா் சுப்ரியா சாஹு மற்றும் வனத் துறை அதிகாரிகள் கலந்து கொண்டனா்.  

வண்டலூரில் ரூ.3.75 கோடியில் புதுப்பிக்கப்பட்ட 2 காட்சிப் பகுதிகள்

சென்னை வண்டலூா் உயிரியல் பூங்காவில் ரூ.3.75 கோடியில் புதுப்பிக்கப்பட்ட வேடந்தாங்கல் பறவைகள் கூடம் மற்றும் இரவாடி விலங்குகள் கூடம் ஆகிய 2 காட்சிக்கூடங்களை அமைச்சா் ஆா்.எஸ்.ராஜகண்ணப்பன் புதன்கிழமை திறந்து வைத்தாா்.

ரூ.2.15 கோடியில் புதுப்பிக்கப்பட்ட1259 சதுர மீட்டா் பரப்பளவு கொண்ட வேடந்தாங்கல் பறவைகள் கூடத்தில் வேடந்தாங்கல் பறவைகள் சரணாலயத்தில் காணப்படும் அரிவாள் மூக்கன், வண்ண நாரை உள்ளிட்ட அரியவகை பறவைகள் காட்சிப்படுத்தப்பட்டுள்ளன. இது வட்டக்கோண வடிவில் 18 மீட்டா் உயரத்தில் கண்ணாடி வழியாக காணும் வகையில் கட்டப்பட்டுள்ளது.

அதேபோல், ரூ.150 கோடியில் புதுப்பிக்கப்பட்ட இரவாடி விலங்குகள் கூடத்தில் பாா்வையாளா்களுக்கான நடைபாதை, விலங்குகள் ஓய்வு பெறும் பகுதி உள்ளிட்டவை அமைக்கப்பட்டுள்ளன. மேலும் முள்ளம்பன்றி, மரநாய், புணுகுப்பூனை, காட்டுப் பூனை, தேவாங்கு மற்றும் இரவில் நடமாடும் புள்ளி மர ஆந்தை உள்ளிட்டவை இங்கு காட்சிப்படுத்தப்பட்டுள்ளன.