அரசு மருத்துவமனைகளில் லஞ்சத்தைத் தடுக்க நடவடிக்கை: அமைச்சா் மா.சுப்பிரமணியன்

அரசு மருத்துவமனைகளில் லஞ்சம் கேட்பதைத் தடுக்க புகாா் எண்களுடன் கூடிய விழிப்புணா்வு பதாகைகளை வைக்க உள்ளதாக மக்கள் நல்வாழ்வுத் துறை அமைச்சா் மா.சுப்பிரமணியன் தெரிவித்தாா்.

சென்னை எழும்பூா் அரசு மகப்பேறு மருத்துவமனையிலும், குழந்தைகள் நல மருத்துவமனையிலும் அமைச்சா் மா.சுப்பிரமணியன் வியாழக்கிழமை ஆய்வு மேற்கொண்டாா். அப்போது செய்தியாளா்களிடம் அவா் கூறியதாவது:

எழும்பூா் குழந்தைகள் நல மருத்துவமனையில் 65 ஆண்டுகளுக்கு முன்பு அமைக்கப்பட்ட கழிவுநீா் கால்வாய் குழாய்கள் மாற்றப்பட்டு, புதிய குழாய்கள் பொருத்தும் பணி வெள்ளிக்கிழமை பொதுப்பணித் துறை சாா்பில் தொடங்கப்படும். மேலும் இங்கு ரூ.53 கோடி செலவில் 6 தளங்களுடன் கட்டப்பட்டு வரும் புதிய கட்டடம் வரும் டிசம்பா் மாதம் பயன்பாட்டுக்கு வரும்.

கலைஞா் நினைவு மாரத்தான் போட்டியில் கிடைக்கப்பெற்ற ரூ.1.22 கோடி மற்றும் பல்வேறு துறை சாா்ந்து கிடைக்கப் பெற்ற ரூ.5. 89 கோடியைக் கொண்டு ஓய்வு அரங்கம் கட்டப்பட்டு வருகிறது. சிகிச்சை பெறும் குழந்தைகளின் பெற்றோா் தங்கும் வகையில் 100 படுக்கைகளுடன் அமைய உள்ளது.

மகப்பேறு மருத்துவமனையில் மின்தூக்கி பழுதாகி இருப்பதால் நோயாளிகள் அவதிப்படுவதாக செய்திகள் வந்தன. உடனடியாக அப்பிரச்னையை சரி செய்யும் பணிகள் நடைபெற்று வருகின்றன.

அரசு மருத்துவமனைகளின் அனைத்து இடங்களிலும் லஞ்சப் புகாா்கள் எழுவதில்லை. ஒரு சில இடங்களில் நான்காம் நிலை ஊழியா்கள் சிறிய அளவில் தவறுகள் செய்கிறாா்கள்.

லஞ்சம் பெறுவதைத் தடுக்க மகப்பேறு மருத்துவமனையிலும், குழந்தைகள் நல மருத்துவமனையிலும் தலா 50 வீதம் மொத்தம் 100 விழிப்புணா்வு பதாகைகள் வைக்க உள்ளோம். அதில் லஞ்சம் தொடா்பான புகாா்களை அளிக்க அதிகாரிகளின் கைப்பேசி எண்கள் இடம் பெற்றிருக்கும். ஊழியா்களுக்கு பணம் கொடுத்து அவா்களை பொதுமக்கள் ஊக்கப்படுத்தக் கூடாது என்றாா்.

இந்த ஆய்வின் போது, மக்கள் நல்வாழ்வுத் துறைச் செயலா் ப.செந்தில்குமாா், சட்டப்பேரவை உறுப்பினா் பரந்தாமன், ராஜீவ் காந்தி அரசு மருத்துவமனை முதல்வா் சாந்தாராமன், எழும்பூா் குழந்தைகள் நல மருத்துவமனை இயக்குநா் டாக்டா் லட்சுமி, மகப்பேறு மருத்துவமனை இயக்குநா் டாக்டா் சுமதி ஆகியோா் உடனிருந்தனா்.