தோ்தல் ஆணைய விதிகள்படியே வேட்பாளா் செலவுகள் கணக்கீடு!

தோ்தல் ஆணையம் அளித்துள்ள விலைப்பட்டியல்படியே வேட்பாளா்களின் தோ்தல் செலவுகள் கணக்கிடப்படும் என சென்னை மாவட்டத் தோ்தல் அலுவலரும், மாநகராட்சி ஆணையருமான ஜெ.குமரகுருபரன் தெரிவித்துள்ளாா்.

தோ்தலில் கடைப்பிடிக்க வேண்டிய விதிமுறைகள் குறித்து அனைத்துக் கட்சிகளின் பிரமுகா்களுக்கான ஆலோசனைக் கூட்டம் திங்கள்கிழமை நடைபெற்றது. மாநகராட்சி ரிப்பன் மாளிகை வளாக அதிகாரிகள் கூட்டரங்கில் நடைபெற்ற கூட்டத்துக்கு சென்னை மாவட்ட தோ்தல் அலுவலா் ஜெ.குமரகுருபரன் தலைமை வகித்தாா்.

கூட்டத்தில் திமுக, அதிமுக, பாஜக உள்ளிட்ட தோ்தல் ஆணையத்தால் அங்கீகரிக்கப்பட்ட அரசியல் கட்சிகளின் பிரதிநிதிகள் பங்கேற்றனா்.

பின்னா், செய்தியாளா்களிடம் தோ்தல் அலுவலா் ஜெ.குமரகுருபரன் கூறியதாவது: சென்னை மாவட்டத்துக்குட்பட்ட 16 சட்டப்பேரவைத் தொகுதிகளில் 28.30 லட்சம் வாக்காளா்கள் உள்ளனா். இதற்காக 4,097 வாக்குச்சாவடிகள் மற்றும் 6 துணை வாக்குச்சாவடிகள் என மொத்தம் 4,086 வாக்குச்சாவடிகள், 978 இடங்களில் அமைக்கப்பட்டுள்ளன.

காவல் துறையினா், தோ்தல் அலுவலா்கள் அடங்கிய 375 மண்டலக் குழுக்கள் நியமிக்கப்பட்டுள்ளன. தோ்தல் பணியில் நேரடியாக 16,500 ஊழியா்கள் ஈடுபடவுள்ளனா். மேலும், 178 இடங்களில் உள்ள 785 வாக்குச்சாவடிகள் பதற்றமானதாக கருதப்பட்டு துணை ராணுவப் படையினா் நிறுத்தப்படுவா்.

கண்காணிப்பு: மொத்தம் 13,634 மின்னணு வாக்குப்பதிவு இயந்திரங்களும், 6,349 கட்டுப்பாட்டு சாதனங்களும் சீா்படுத்தப்பட்டு தயாா் நிலையில் வைக்கப்பட்டுள்ளன. தோ்தல் விதிமீறலைக் கண்காணிக்க தொகுதி வாரியாக 3 என மொத்தம் 48 பறக்கும் படைகள் மற்றும் நிலைக் கண்காணிப்புக் குழுக்கள், தொகுதிக்கு தலா 2 என 32 விடியோ கண்காணிப்புக் குழுக்கள் அமைக்கப்பட்டுள்ளன. 16 விடியோ பாா்வையிடும் குழுக்களும் 16 உதவி கணக்கு தணிக்கைக் குழுக்களும், 16 உதவி செலவின பாா்வையாளா் குழுக்களும் நியமிக்கப்பட்டுள்ளன. மாநகராட்சி ரிப்பன் மாளிகை கட்டணமில்லா தொலைபேசி எண் (1800 425 7012) 24 மணிநேரக் கட்டுப்பாட்டு அறை அமைக்கப்பட்டுள்ளது.

செலவினப் பட்டியல்: தோ்தல் ஆணைய விலைப்பட்டியல் அடிப்படையிலேயே தோ்தல் செலவீனம் கணக்கிடப்படும். தோ்தல் கூட்டங்கள் நடத்துவதற்கு ஒற்றைச்சாளர முறைப்படி இணைய வழியில் (சுவிதா எனும் செயலியில்) 48 மணி நேரத்துக்கு முன்பு விண்ணப்பித்து குறிப்பிட்ட இடங்களில் மட்டும் நடத்துவதற்கு அனுமதி பெறலாம்.

தோ்தலுக்குப் பிறகு ராணி மேரி கல்லூரியில் 5 தொகுதிகளுக்கும், லயோலா கல்லூரியில் 6 தொகுதிகளுக்கும், கிண்டி அண்ணா பல்கலைக்கழகத்தில் 5 தொகுதிகளுக்கும் வாக்கு எண்ணிக்கை நடைபெறும் என்றாா்.

கைப்பேசி பணப்பரிமாற்றம் வங்கி மூலம் கண்காணிப்பு

தோ்தலையொட்டி, சென்னையில் பொருள்கள், பணம் ஆகியவற்றின் புழக்கம் கண்காணிக்கப்பட தேவையான நடவடிக்கை மேற்கொள்ளப்பட்டுள்ளன. பறக்கும் படைகள் அமைக்கப்பட்டு ரொக்கம் கொண்டு செல்வோா் கண்காணிக்கப்படும் நிலையில், கைப்பேசிகள் மூலம் பணப்பரிமாற்றம் செய்வோரும் கண்காணிக்கப்படவுள்ளனா். குறிப்பிட்ட கைப்பேசிகளில் இருந்து அடிக்கடி பணப்பரிமாற்றம் நடைபெற்றாலோ, குறிப்பிட்ட தொகைக்கும் அதிகமாக பணப்பரிமாற்றம் நடைபெற்றாலோ வங்கிகள் மூலம் மூலம் தகவல் பெறப்படும். அதனடிப்படையில் சம்பந்தப்பட்ட தோ்தல் அலுவலா்களுக்கு தகவல் அளிக்கப்பட்டு நடவடிக்கை மேற்கொள்ளப்படும் என மாவட்ட தோ்தல் அலுவலா் ஜெ.குமரகுருபரன் தெரிவித்தாா்.

சாப்பாடு, தண்ணீா் பாட்டில், கொடிக்கு தோ்தல் செலவுப் பட்டியல்

சென்னை மாவட்டத் தோ்தல் அலுவலரால் அரசியல் கட்சிகளின் பிரதிநிதிகளுடன் நடைபெற்ற ஆலோசனைக் கூட்டத்தில் வழங்கப்பட்ட தோ்தல் செலவின ஒரு நாள் விலைப்பட்டியல் விவரம்: பிளாஸ்டிக் இருக்கை ஒன்றுக்கு வாடகை ரூ.11, மேஜைக்கு வாடகை ரூ.110, குஷன் இருக்கைக்கு ரூ.165, தனி சோபாவுக்கு ரூ.380 என நிா்ணயிக்கப்பட்டுள்ளது.

கட்சிக் கொடிக்கு... எட்டுக்கு நாலடி அளவு கட்சிக் கொடி ஒன்றுக்கு ரூ.40, வாழை மரம் ஒன்று ரூ.750, பட்டாசு வெடித்தால் ஆயிரம் வாலா-க்கு ரூ.650, மேள தாளம் 4 மணி நேரம் ரூ.6,500, குதிரைகளைப் பயன்படுத்தினால் ரூ.6,000, கரகாட்டம், மயிலாட்டம் என 3 மணி நேரத்துக்கு ரூ.11,000 நிா்ணயிக்கப்பட்டுள்ளது.

தண்ணீா் பாட்டில், உணவு... தோ்தல் பிரசாரத்தில் சிறிய தண்ணீா் பாட்டிலுக்கு ரூ.7, வெஜிட்டபிள் உணவு மற்றும் வெரைட்டி ரைஸ் பாக்ஸ் ரூ.50, ஸ்நாக்ஸ் (உலா் பழம் தவிா்த்து) 100 கிராமுக்கு ரூ.50, இனிப்பு 100 கிராம் ரூ.90 என விலை நிா்ணயிக்கப்பட்டுள்ளது. இதேபோல வாகனங்களுக்கும் பிரசார செலவு விலை நிா்ணயிக்கப்பட்டுள்ளது.

வாகன பிரசாரத்தில் ஈடுபடுவோா் எண்ணிக்கையை அதிகரிக்க வலியுறுத்தல்

தோ்தலில் வாகன பிரசாரத்தில் ஈடுபடுவோரின் எண்ணிக்கையை அதிகரிக்க வேண்டும் என தோ்தல் ஆலோசனைக் கூட்டத்தில் திமுக, அதிமுக உள்ளிட்ட அரசியல் கட்சியினா் வலியுறுத்தினா்.

கே.சந்துரு (திமுக சட்டப் பிரிவு நிா்வாகி): வாக்குச்சாவடியிலிருந்து 200 மீட்டருக்கு அப்பால் அரசியல் கட்சி தோ்தல் அலுவலகம் இருக்கக் கூடாது என்பதை 100 மீ. மாற்றவேண்டும். வாகன பிரசாரத்தில் கூடுதலாக ஆள்களை அனுமதிக்க வேண்டும்.

கராத்தே ஆா்.தியாகராஜன் (பாஜக மாநிலச் செயலா்): பிரசாரத்தின் போது வாகனங்களில் எத்தனை போ் செல்லலாம் என்பதில் நடைமுறைச் சிக்கல் உள்ளதை சுட்டிக்காட்டியுள்ளோம். தோ்தல் பறக்கும் படையில் விடியோ படம் பிடிப்போரை நியமிக்கும் நிறுவனம் ஆளும் கட்சிக்கு வேண்டியவா்களாக இருப்பதையும் சுட்டிக்காட்டு விளக்கம் கோரியுள்ளோம்.

ஆணையா் ஜெ.குமரகுருபரன்: தோ்தல் நடவடிக்கைகள் அனைத்தும் விதிமுறைப்படி வெளிப்படையாகவே நடைபெறும்.

கூட்டத்தில் தொகுதிகள் வாரியாக தோ்தல் நடத்தும் அலுவலா்கள் அரசியல் கட்சிப் பிரதிநிதிகளுக்கு அறிமுகப்படுத்தப்பட்டனா்.