எழுத்தாளர் லட்சுமணன் காலமானார்

மஞ்சரி இதழின் முன்னாள் ஆசிரியரும், எழுத்தாளர் சாருகேசியின் சகோதரருமான "லெமன்' (எ) எஸ்.லட்சுமணன் (84) உடல்நலக் குறைவு காரணமாக சென்னையில் வெள்ளிக்கிழமை இரவு (அக்.27) காலமானார். அவருக்கு துர்கா என்ற ஒரு மகள் உள்ளார். 
சேலத்தைச் சேர்ந்த எஸ்.லட்சுமணன் (எ) லெமன், மிக இளம் வயதிலேயே எழுத்துத் துறையில் ஆர்வத்துடன் நுழைந்தவர். மரபுக் கவிதைகள் எழுதுவதில் பெரிதும் ஆர்வம் கொண்டிருந்த அவர், சிறுவர் இதழான 'கண்ணனி'ல் பல சிறுவர் இலக்கியங்களைப் படைத்தவர். அதன் துணையாசிரியராகவும் சில ஆண்டுகள் பணியாற்றிவிட்டு பின்னர் கலைமகள் நிறுவனத்துக்குப் பணிக்கு வந்தார். 'கண்ணனி'ல் அவர் படைத்த சிறுவர் கதைகள், பாலர் பாடல்கள் சிறுவர் இலக்கியத்தில் தவிர்க்கப்பட முடியாதவை. 
சிறுவர் இதழில்...: தனது கவிதையாற்றல் காரணமாக மாதம் இரு முறை வெளியான "கண்ணன்' இதழின் துணை ஆசிரியராக எழுத்தாளர் "லெமன்' பணியாற்றினார். அதன் பிறகு மஞ்சரி இதழின் ஆசிரியராக அவர் பொறுப்பேற்றார்.
தமிழின் "ரீடர்ஸ் டைஜஸ்ட்': தி.ஜ.ர. (தி.ஜ.ரங்கநாதன்) ஆரம்பித்து வைத்த புத்தகச் சுருக்கம் என்ற பகுதியை மஞ்சரி தொடர்ந்து வெளியிட்டு வந்தது. இந்திய இலக்கியம், வரலாறு, மருத்துவம், சமூகம் விஞ்ஞானம், பொருளாதாரம் எனப் பலதரப்பட்ட துறைகள் குறித்த செய்திகள், உலகப் புகழ்பெற்ற நாவல்கள், சுயசரிதங்களை மஞ்சரியில் வெளியிட்டு அதன் வளர்ச்சிக்கு லெமன் துணைநின்றார். அவரது காலகட்டத்தில் மஞ்சரியை தமிழுக்கான "ரீடர்ஸ் டைஜஸ்ட்' எனச் சொல்லும் அளவுக்கு புகழ் பெற வைத்தார்.
ஓய்வுக்குப் பிறகும் எழுத்துப்பணியைத் தொடர்ந்தார். "கல்கி', "அமுதசுரபி' உள்ளிட்ட பல இலக்கியப் பத்திரிகைகளில் அவரது படைப்புகள் வெளியாகின. இவர் எழுதிய சிறார் கவிதைத் தொகுப்புகள் "கொக்கரக்கோ', "சிப்பாய் வரார்' ஆகிய இரண்டும் கலைமகள் வெளியீடுகளாக ரெஸாக்கின் வண்ண ஓவியங்களுடன் வெளியாகி முதல் நூலுக்கு மத்திய அரசின் பரிசும் கிடைத்தது.
மறைந்த எழுத்தாளர் "லெமன்' எழுதிய "மழைக் கிளிகள்' என்ற சிறுவர் கதைப் புத்தகம் விரைவில் வெளியாகவுள்ளது. அவருடைய இறுதிச் சடங்குகள் சென்னை மயிலாப்பூரில் உள்ள மயானத்தில் சனிக்கிழமை (அக்.28) நடைபெற்றது. தொடர்புக்கு...9841876468.