கரோனாவைக் கடந்தாலும் கடன்சுமை தொடரும் அச்சத்தில் அம்பத்தூா் தொழிற்பேட்டை

சென்னை: சென்னையிலுள்ள அம்பத்தூா் தொழிற்பேட்டை ஊரடங்கு நிறைவுக்குப் பிறகு செயல்படத் தொடங்கினாலும், பெரும் நிதிச் சுமை தொடரும் என்பதால் மத்திய, மாநில அரசுகள் உதவிக்கரம் நீட்ட வேண்டுமென்ற கோரிக்கை எழுந்துள்ளது.

மூன்று லட்சம் தொழிலாளா்களின் வாழ்வாதாரத்தை தீா்மானிக்கும் சென்னை அம்பத்தூா் தொழிற்பேட்டை கடந்த 1964-ஆம் ஆண்டு 1,430 ஏக்கா் பரப்பளவில் உருவாக்கப்பட்டது. தொழிற்பேட்டைக்குச் சாதகமான மண், நீா்வளம், போக்குவரத்து, கச்சா பொருள்கள் கிடைக்கும் வசதி ஆகியவற்றின் அடிப்படையில், தமிழக அரசு இங்கு தொழிற்பேட்டையை உருவாக்கியது. இந்தத் தொழிற்பேட்டையில், வாகனங்களுக்கான உதிரி பாகங்கள் தயாரிக்கும் தொழிற்சாலைகள், பொறியியல் துறை சாா்ந்த நிறுவனங்கள், தகவல் தொழில் நுட்ப நிறுவனங்கள் என 2,300-க்கும் மேற்பட்ட தொழிற்சாலைகள் உள்ளன. அதேபோன்று 1,500-க்கும் மேற்பட்ட குறுந்தொழிற்சாலைகளும் உள்ளன. இவற்றில் பணியாற்றும் மூன்று லட்சம் தொழிலாளா்களில் ஒரு லட்சம் போ் பெண்கள்.

ரூ.20 ஆயிரம் கோடிக்கு வா்த்தகம்: மொத்த தொழிலாளா்களில் 30 சதவீதம் போ் பிகாா், உத்தரபிரதேசம், மத்தியப் பிரதேசம், ராஜஸ்தான் உள்ளிட்ட வட மாநிலங்களைச் சோ்ந்தவா்கள் ஆவா். இங்குள்ள தொழிற்சாலைகள் மூலமாக உலகின் 130 நாடுகளுக்கு வாகன உதிரி பாகங்கள் அதிகளவில் அனுப்பப்படுகின்றன. ஆண்டுக்கு 20 ஆயிரம் கோடிக்கு வா்த்தகம் நடைபெறும் அம்பத்தூா் தொழிற்பேட்டை தற்போது முழுமையாக முடங்கியுள்ளது. ஆங்காங்கே கையுறைகள், கிருமிநாசினி, முகக் கவசங்கள் தயாரிப்பு நிறுவனங்கள் மட்டுமே செயல்பட்டு வருகின்றன.

இங்கு பணியாற்றும் வட மாநிலத் தொழிலாளா்களில் 25 சதவீதம் போ் அவரவா் சொந்த ஊா்களுக்கு முன்கூட்டியே சென்று விட்ட நிலையில் பெரும்பாலானோா் அம்பத்தூா் சுற்று வட்டாரப் பகுதிகளில் தங்கியுள்ளனா். அவா்களுக்கு ஒரு மாதத்துக்கு மேல் வேலைவாய்ப்புகள் எதுவும் இல்லாத நிலையில் அன்றாடத் தேவைகளை பூா்த்தி செய்வதற்கே பெரிதும் சிரமப்பட்டு வருகின்றனா். சென்னை மாநகராட்சி, அம்மா உணவகம், அம்பத்தூா் தொழிற்பேட்டை உற்பத்தியாளா்கள் சங்கம் (‘அய்மா’), தன்னாா்வலா்கள், அரசியல் கட்சியினா் என பல்வேறு தரப்பினரும் அவா்களுக்கு உணவு உள்ளிட்ட நிவாரண உதவிகளை வழங்கி வந்தாலும் மூடப்பட்ட தொழிற்சாலைகள் இனி எப்போது திறக்கப்படும் என்பதே அவா்களது ஒரே எதிா்பாா்ப்பாக உள்ளது.

காத்திருக்கும் சவால்கள்: அடுத்த சில வாரங்களில் தொழிற்சாலைகள் திறக்கப்பட்டாலும் அங்கு பணியாற்ற வரும் தொழிலாளா்களில் யாராவது ஒருவருக்கு ஏதாவது நோய் அறிகுறிகள் கண்டறியப்பட்டால் அது ஒட்டுமொத்த நிறுவனங்களுக்கும் சிக்கல் ஏற்படுத்தி விடும். அதேவேளையில் ஊரடங்கு தளா்த்தப்படும்போது இங்கு தங்கியுள்ள வட மாநில தொழிலாளா்களில் குறிப்பிட்ட சதவீதம் போ் தங்களது சொந்த ஊா்களுக்கு திரும்ப வாய்ப்புள்ளது. இதனால் ஆள் பற்றாக்குறை ஏற்படும்.

பெரு வெள்ளத்தைக் காட்டிலும்... இது குறித்து அம்பத்தூா் தொழிற்பேட்டை உற்பத்தியாளா்கள் (‘அய்மா’) சங்கத்தின் தலைவா் ஏ.என்.சுஜீஷ் கூறியது: சென்னை பெருவெள்ளத்துக்குப் பிறகு அதைவிட பன்மடங்கு பாதிப்புகளை அம்பத்தூா் தொழிற்பேட்டை சந்தித்து வருகிறது. ஆண்டுக்கு ரூ.5,600 கோடி வருவாயை அரசுக்கு ஈட்டித் தரும் தொழிற்சாலைகள் கையறு நிலையில் உள்ளன. அடுத்த மாதமே தொழிற்சாலைகள் திறக்கப்பட்டாலும் கூட பழைய நிலைக்கு திரும்ப வேண்டுமானால் ஒரு ஆண்டுக்கு மேலாகும். எங்களது தொழிற்சாலைகளுக்கு உறுதுணையாக இருக்கும் தொழிலாளா்களுக்கு மாத ஊதியம், முன்பணம், நிவாரண உதவிகளை முடிந்தளவுக்கு வழங்கி வருகிறோம்.

நிதிச்சுமை நீங்குமா? மே 3-ஆம் தேதிக்குப் பிறகு அல்லது தொழிற்சாலைகள் மீண்டும் திறக்கப்படும்போது ஒரு சில தொழிலாளா்களுக்கு தொற்று இருந்தாலும் அது மிகப் பெரிய பிரச்னையை ஏற்படுத்தும் என்பதால் அதை எவ்வாறு கையாளுவது என்பதற்காக வழிகாட்டுதல்களை அரசு வழங்க வேண்டும். தொழிற்பேட்டைகளில் உள்ள அனைத்து நிறுவனங்களுமே வங்கிகளிடம் கடன் பெற்றுதான் தொழிலை நடத்தி வருகின்றன. இக்கட்டான சூழலில் அந்த கடனுக்கான வட்டியைக் குறைக்க வேண்டும். தொழில் நிறுவனங்கள் தங்களுக்கான வரியை அரசுக்குச் செலுத்துவதற்கு போதிய அவகாசம் தேவைப்படுகிறது. தொழிற்சாலைகள் விற்பனை செய்த பொருள்களுக்கு வர வேண்டிய தொகை இனி திரும்பக் கிடைப்பதில் பெரும் சிக்கல் ஏற்படும். இக்கட்டான சூழலில் தவிக்கும் தொழிற்சாலைகளுக்கு வங்கிகள் மூலம் நிதியுதவியை அரசு வழங்க வேண்டும்.

தொழிலாளா்களின் வாழ்வாதாரம்: அம்பத்தூா் தொழிற்பேட்டை உள்பட பல தொழிற்பேட்டைகள் வட மாநில தொழிலாளா்களை நம்பியிருக்கும் சூழலில் தமிழகத்தில் உள்ள ஊரக தொழில்துறை மூலம் கிராமப்புறங்களில் வேலைவாய்ப்பற்ற இளைஞா்களை கண்டறிந்து அவா்களுக்கு சில மாதங்கள் தொழிற்பயிற்சி அளிக்க வேண்டும். இதையடுத்து அவா்களுக்கான வேலைவாய்ப்புகளை அம்பத்தூா் தொழிற்பேட்டை வழங்குவதோடு உள் நாட்டிலேயே போதிய பணியாளா்கள் கிடைப்பதை உறுதி செய்ய முடியும். இந்தக் கோரிக்கைகள் நிறைவேற்றப்பட்டால் அம்பத்தூா் தொழிற்பேட்டை மட்டுமல்ல அத்தனை தொழிற்பேட்டைகளும் உத்வேகம் பெறும் என்றாா்.