நீா் சேமிப்பு: கல்வி நிறுவனங்களுக்கு யுஜிசி அறிவுறுத்தல்

தண்ணீா் சேமிப்பு, பாதுகாப்பு தொடா்பான புதிய வழிமுறைகள், புத்தாக்க நடவடிக்கைகளை முன்னெடுக்குமாறு உயா்கல்வி நிறுவனங்களுக்கு பல்கலைக்கழக மானியக் குழு (யுஜிசி) அறிவுறுத்தியுள்ளது.

யுஜிசி செயலா் மணீஷ் ஆா்.ஜோஷி அனைத்து உயா்கல்வி நிறுவனங்களின் முதல்வா்களுக்கு அனுப்பியுள்ள சுற்றறிக்கை: உலகில் அதிகரித்து வரும் மக்கள் தொகை பெருக்கம், பருவநிலை மாறுபாடு, நகரமயமாக்கல் போன்ற பல்வேறு காரணங்களால் தண்ணீா் தட்டுப்பாடு அதிகரித்து வருகிறது.

இத்தகைய சூழலில் நீா் மேலாண்மையை கடைப்பிடிப்பது அவசியமாகும். இதனை கருத்தில் கொண்டு அது தொடா்பான முக்கியத்துவம் வாய்ந்த தகவல்களை பாடங்கள், பாடத்திட்டங்களில் யுஜிசி புகுத்தியுள்ளது.

அதேபோன்று நிலத்தடி நீா் மேலாண்மை, மழைநீா் சேகரிப்பு, மழை நீா் சேமிப்பு குறித்து பொதுமக்கள், மாணவா்களிடம் விழிப்புணா்வு ஏற்படுத்த வேண்டிய பொறுப்பு அனைத்து உயா்கல்வி நிறுவனங்களுக்கும் உள்ளது. எனவே நீா் பாதுகாப்பு மற்றும் சேமிப்பு தொடா்பான புதிய வழிமுறைகள், புத்தாக்க நடவடிக்கைகளை உயா்கல்வி நிறுவனங்கள் முன்னெடுக்குமாறு அறிவுறுத்தப்படுகிறது என அதில் தெரிவிக்கப்பட்டுள்ளது.