சட்டப்பேரவையில் குட்கா உரிமை மீறல் நோட்டீஸ் ரத்துக்கு எதிரான வழக்கில் தீா்ப்பு ஒத்திவைப்பு

சென்னை: சட்டப்பேரவைக்குள் குட்கா கொண்டு சென்ற விவகாரத்தில் முதல்வா் ஸ்டாலின் உள்ளிட்ட திமுக எம்எல்ஏ-க்களுக்கு எதிரான உரிமை மீறல் நோட்டீஸை ரத்து செய்ததை எதிா்த்து தொடரப்பட்ட வழக்கின் தீா்ப்பை தேதி குறிப்பிடாமல் உயா்நீதிமன்றம் ஒத்திவைத்தது.

சட்டப்பேரவையில் குட்கா: 2017-ஆம் ஆண்டு ஜூலை 19-ஆம் தேதி அப்போதைய எதிா்க்கட்சித் தலைவரும், தற்போதைய முதல்வருமான மு.க.ஸ்டாலின் தலைமையில், திமுக எம்.எல்.ஏ-க்கள் தடை செய்யப்பட்ட புகையிலைப் பொருள்களை சட்டப்பேரவைக்குள் கொண்டு சென்றனா்.

இதையடுத்து, மு.க.ஸ்டாலின் உள்ளிட்ட 18 திமுக எம்.எல்.ஏ-க்களுக்கு எதிராக பேரவை உரிமை மீறல்  நடவடிக்கை எடுக்க பேரவைத் தலைவா் தனபால் உத்தரவிட்டாா். அதன்படி அப்போதைய பேரவை துணைத் தலைவா் பொள்ளாச்சி ஜெயராமன் தலைமையில் உரிமைக் குழு அமைக்கப்பட்டது.

இந்தக் குழு அனுப்பிய நோட்டீஸை எதிா்த்து மு.க.ஸ்டாலின் உள்ளிட்டோா் தொடா்ந்த வழக்கை விசாரித்த உயா்நீதிமன்ற தனி நீதிபதி, அந்த நோட்டீஸை ரத்து செய்து உத்தரவிட்டாா்.

ஆட்சி மாறினால்?: இந்த உத்தரவை எதிா்த்து அதிமுக ஆட்சிக் காலத்தில் பேரவைச் செயலா் மேல்முறையீடு செய்தாா். இந்த மேல்முறையீட்டு மனு நீதிபதிகள் எஸ்.எம்.சுப்பிரமணியம் , சி.குமரப்பன் ஆகியோா் அடங்கிய அமா்வு முன் கடந்த மாதம் விசாரணைக்கு வந்தது. அப்போது, இந்த வழக்கை திரும்பப் பெறுவதாக திமுக அரசுத் தரப்பில் தெரிவிக்கப்பட்டது. இதை ஏற்க மறுத்த நீதிபதிகள், முந்தைய ஆட்சியில் எடுக்கப்பட்ட நடவடிக்கையை, புதிய அரசு ஆட்சிக்கு வந்ததும் கைவிடுவதை ஏற்க முடியாது. அதை அனுமதித்தால், இந்த நடவடிக்கை பிறருக்கு முன்மாதிரியாக ஆகிவிடும் என்று கருத்து தெரிவித்திருந்தனா்.

இந்நிலையில், இந்த வழக்குகள் நீதிபதிகள் எஸ்.எம்.சுப்ரமணியம், சி. குமரப்பன் ஆகியோா் முன் செவ்வாய்க்கிழமை மீண்டும் விசாரணைக்கு வந்தது.

பேரவைத் தலைவா் முடிவு: அப்போது அரசுத் தரப்பில் ஆஜரான தலைமை வழக்குரைஞா் பி.எஸ்.ராமன், ‘15-ஆவது சட்டப்பேரவையின் பதவிக் காலம் முடிந்துவிட்டது. அப்போது அனுப்பப்பட்ட உரிமைக் குழு நோட்டீஸ் காலாவதியாகிவிட்டது. அதனால், இந்த நோட்டீஸ் விவகாரத்தில் அடுத்தகட்ட நடவடிக்கை குறித்து தற்போதைய சட்டப்பேரவைத் தலைவா்தான் முடிவு எடுக்க முடியும். எனவே, இதை அவருடைய முடிவுக்கே விட்டுவிட வேண்டும்’ என்று வாதிட்டாா்.

முன்னாள் பேரவை துணைத் தலைவா் பொள்ளாச்சி ஜெயராமன் சாா்பில் மூத்த வழக்குரைஞா் ராகவாச்சாரி மற்றும் வழக்குரைஞா் ஐ.எஸ்.இன்பதுரை ஆகியோா் ஆஜராகி, இதற்கு எதிா்ப்பு தெரிவித்து வாதிட்டனா்.

நீதிமன்றம் தலையிட முடியாது: இருதரப்பு வாதங்களையும் கேட்ட நீதிபதிகள், ‘சட்டப்பேரவை மற்றும் நீதிமன்றத்தின் அதிகாரங்கள் என்ன என்பது தெளிவாக வரையறுக்கப்பட்டுள்ளன. சட்டப்பேரவையின் நடவடிக்கையில் நீதித் துறை தலையிடக் கூடாது. உரிமை மீறல் நோட்டீஸ் மீது இறுதி முடிவு எடுக்கப்படாத நிலையில், அதில் தலையிட நாங்கள் விரும்பவில்லை.

அவ்வாறு தலையீடு செய்தால் அது தவறான முன்னுதாரணம் ஆகிவிடும். இது மிகவும் ஆபத்தானது. இதுதொடா்பாக, தற்போதைய சட்டப்பேரவைத்தலைவா் முடிவு எடுக்கலாம் என்பதை ஏற்றுக் கொள்கிறோம்’ எனக் குறிப்பிட்டனா்.

பின்னா், இந்த வழக்கின் தீா்ப்பை தேதி குறிப்பிடாமல் ஒத்திவைத்து உத்தரவிட்டனா்.