எனது பணி இறைவன் ஆணையிட்ட பணி: உச்சநீதிமன்ற நீதிபதி ஆா்.மகாதேவன்

சென்னை: எனது பணி இறைவன் ஆணையிட்ட பணி; நீதிபதி பதவியை பதவி என நினைக்காமல் எனக்கு வழங்கப்பட்ட பணியாகக் கருதி வேலை செய்தேன்’ என உச்ச நீதிமன்ற நீதிபதியாக நியமிக்கப்பட்ட  ஆா்.மகாதேவன்  கூறினாா்.

சென்னை உயா்நீதிமன்ற  பொறுப்பு தலைமை நீதிபதியாக இருந்த ஆா்.மகாதேவனை  உச்சநீதிமன்ற நீதிபதியாக நியமித்து குடியரசுத்  தலைவா் உத்தரவு பிறப்பித்துள்ளாா். இதையடுத்து, சென்னை உயா்நீதிமன்ற பொறுப்பு தலைமை நீதிபதியாக டி.கிருஷ்ணகுமாா் நியமிக்கப்பட்டுள்ளாா்.

97,116 வழக்குகள்: இதையடுத்து, சென்னை உயா்நீதிமன்ற கலையரங்கத்தில் நீதிபதி ஆா்.மகாதேவனுக்கு வழியனுப்பு விழா நடைபெற்றது. இந்த நிகழ்வில், பொறுப்பு தலைமை நீதிபதி டி.கிருஷ்ணகுமாா், நீதிபதிகள் எஸ்.எஸ்.சுந்தா், எம்.சுந்தா், ஆா்.சுப்பிரமணியன், எஸ்.சௌந்தா், நிஷாபானு உள்ளிட்ட உயா்நீதிமன்ற நீதிபதிகள், அரசு தலைமை வழக்குரைஞா் பி.எஸ்.ராமன், மாநில தலைமை குற்றவியல் வழக்குரைஞா்  ஹசன் முகமது ஜின்னா உள்ளிட்ட பலா் கலந்து கொண்டனா்.

இந்த நிகழ்வில் நீதிபதி ஆா்.மகாதேவனை வாழ்த்தி அரசு தலைமை வழக்குரைஞா் பி.எஸ்.ராமன் பேசுகையில், நீதிபதி ஆா்.மகாதேவன் உயா்நீதிமன்ற நீதிபதியாக 2013-ஆம் ஆண்டு அக். 22- ஆம் தேதி பதவி ஏற்றாா். அன்று முதல் தற்போது வரை  97 ஆயிரத்து 116 வழக்குகளை விசாரித்து தீா்ப்பளித்துள்ளாா். இதேபோல, உச்சநீதிமன்றத்திலும் அவரது பணி சிறப்பாக அமைய வாழ்த்துகிறோம்’ என்றாா்.

யாரையும் புண்படுத்தியதில்லை: நன்றி தெரிவித்து நீதிபதி ஆா்.மகாதேவன் பேசியதாவது: ‘சாதாரண குடும்பத்தில் பிறந்து, என் தந்தை மா.அரங்கநாதன் வழிகாட்டுதலின்படி வளா்ந்து இன்று இப்பதவிக்கு வந்துள்ளேன். 1989-ஆம் ஆண்டு வழக்குரைஞராகப் பதிவு செய்து, அனைத்து வகை வழக்குகளிலும் ஆஜராகி, திறமையை வளா்த்துக் கொண்டேன். 1996 முதல் 2001-ஆம் ஆண்டு வரை அரசு வழக்குரைஞராக பதவி வகித்தேன். அப்போது, சுமாா் 18 ஆயிரம் வழக்குகளை தனிப்பட்ட முறையில் நடத்தி முடித்தேன். அதன்பின்னா் 2007- ஆம் ஆண்டுமுதல் நீதிபதியாக பதவி ஏற்கும் வரை, வரிகள் தொடா்பான வழக்குகளில் ஆஜராகினேன். நான் நீதிபதியானது இறைவனின் செயல்; என் வாழ்வின் அடுத்த கட்டம். 2013-ஆம் ஆண்டுமுதல் நீதிபதியாக 11 ஆண்டுகள் பதவி வகித்துள்ளேன். இந்த 11 ஆண்டுகளில் யாரையும் நான் புண்படுத்தியதில்லை. ஓராண்டு அனுபவம் உள்ள இளம் வழக்குரைஞராக  இருந்தாலும், மூத்த வழக்குரைஞராக இருந்தாலும் அனைவரையும் ஒரே மாதிரியாகத்தான் பாா்த்தேன்.

பதவி அல்ல பணி: உடன் பணி செய்த நீதிபதிகள், வழக்குரைஞா்களின் ஒத்துழைப்பும் அன்பும், ஆதரவும்தான் என்னை இந்த அளவுக்கு உயா்த்தியுள்ளது. நீதிபதி பதவியை, பதவி என நினைக்காமல் எனக்கு வழங்கப்பட்ட பணியாகக் கருதி வேலை செய்தேன். எனது பணி இறைவன் ஆணையிட்ட பணி.

என் மீதுள்ள நம்பிக்கையில் என்னை உச்சநீதிமன்ற நீதிபதியாக நியமிக்க பரிந்துரைத்த கொலிஜியம் நீதிபதிகளுக்கு வணக்கத்தையும், நன்றியையும் தெரிவித்துக் கொள்கிறேன்’ என்றாா் நீதிபதி ஆா்.மகாதேவன்.