300 தற்காலிக ஆசிரியா்கள் பணிநீக்கம்: ராமதாஸ் கண்டனம்

பழங்குடியினா் நலத் துறை பள்ளிகளில் பணியாற்றி வந்த 300 தற்காலிக ஆசிரியா்கள் பணி நீக்கம் செய்யப்பட்டுள்ளதற்கு பாமக நிறுவனா் ராமதாஸ் கண்டனம் தெரிவித்துள்ளாா்.

அவா் திங்கள்கிழமை வெளியிட்ட அறிக்கை: தமிழகத்தில் பழங்குடியினா் நலத் துறையின் கட்டுப்பாட்டில் இயங்கி வரும் 300-க்கும் மேற்பட்ட பள்ளிகளில் 400-க்கும் கூடுதலான

ஆசிரியா் பணியிடங்கள் காலியாக இருக்கும் நிலையில், அவற்றை நிரப்புவதற்கு எந்த நடவடிக்கையும் எடுக்காத அரசு, அந்தப் பள்ளிகளில் ஏற்கெனவே தற்காலிக ஆசிரியா்களாக பணியாற்றி வந்த 300 பேரை பணி நீக்கம் செய்திருக்கிறது.

தொலைநோக்குப் பாா்வையில்லாத நடவடிக்கைகளின் மூலம் பழங்குடியின மாணவா்களின் கல்வி வாய்ப்பை அரசு பறித்திருப்பது கண்டிக்கத்தக்கது. ஆசிரியா்களை நீக்குவதற்காக பழங்குடியினா் நலத் துறை இயக்குநா் கூறியுள்ள காரணங்கள் ஏற்புடையதாக இல்லை.

எனவே, பழங்குடியினா் நலத் துறை பள்ளிகளில் காலியாக உள்ள 438 ஆசிரியா் பணியிடங்களுக்கு நிரந்தர ஆசிரியா்களை நியமிக்க தமிழக அரசு நடவடிக்கை எடுக்க வேண்டும். அதுவரை தற்காலிக ஆசிரியா்கள் 300 பேரும் பணியில் தொடர அனுமதிக்க வேண்டும் என்று ராமதாஸ் கூறியுள்ளாா்.