தவெக மாநாடு: உயிரிழந்தவா்களின் குடும்பத்தினருக்கு விஜய் உதவி

தமிழக வெற்றிக் கழக (தவெக) மாநாட்டில் பங்கேற்க வந்தபோதும், பங்கேற்று திரும்பியபோதும் சாலை விபத்துகளில் சிக்கி உயிரிழந்தவா்களின் குடும்பத்தினருக்கு தவெக தலைவா் விஜய் நிதியுதவி வழங்கினாா்.

விழுப்புரம் அருகே விக்கிரவாண்டி வி.சாலையில் தவெக முதல் மாநில மாநாடு அக்.27-ஆம் தேதி நடைபெற்றது. இந்த மாநாட்டில் பல்வேறு மாவட்டங்களில் இருந்தும் தவெக தொண்டா்களும், விஜயின் ரசிகா்களும் பங்கேற்றனா். இதில், திருச்சியில் இருந்து காரில் சென்ற சீனிவாசன், கலைக்கோவன் ஆகிய இருவா் விபத்தில் உயிரிழந்தனா். அதேபோல், சென்னையில் இருந்து இருசக்கர வாகனத்தில் சென்ற ஒருவா் சாலை விபத்தில் உயிரிழந்தாா். மேலும், சென்னை கீழ்ப்பாக்கம் பகுதியைச் சோ்ந்த சாா்லஸ் மாநாட்டு திடலில் மயங்கி விழுந்து பிறகு மருத்துவமனையில் அனுமதிக்கப்பட்ட நிலையில் உயிரிழந்தாா்.

இவ்வாறு வெவ்வேறு வகையில், தவெக மாநாட்டில் பங்கேற்க வந்த 6 போ் உயிரிழந்தனா். அவா்களின் குடும்பத்தினருக்கு விஜய் வியாழக்கிழமை நிதியுதவி வழங்கினாா். உயிரிழந்த 6 பேரின் குடும்பத்தினரை சென்னை அருகே பனையூரில் உள்ள தவெக அலுவலகத்துக்கு வரவழைத்த விஜய், அவா்களின் குடும்பச் சூழலுக்கு ஏற்றாற்போல் ஒவ்வொருவருக்கும் தனிப்பட்ட முறையில் நிதி வழங்கினாா். யாருக்கு எவ்வளவு நிதி அளிக்கப்பட்டது என்பது குறித்து அறிவிக்கப்படவில்லை.