செந்தில் பாலாஜி மீதான வழக்கை வேறு மாநிலத்துக்கு மாற்ற வேண்டும்: ராமதாஸ்

அமைச்சா் செந்தில் பாலாஜி மீதான வழக்கை வேறு மாநிலத்துக்கு மாற்ற உச்சநீதிமன்றத்துக்கு தமிழக அரசு பரிந்துரைக்க வேண்டும் என்று பாமக நிறுவனா் ராமதாஸ் வலியுறுத்தியுள்ளாா்.

அவா் திங்கள்கிழமை வெளியிட்ட அறிக்கையில், செந்தில் பாலாஜி மீதான மோசடி வழக்கும், அதனடிப்படையிலான பண மோசடி தடுப்புச் சட்ட வழக்கும் முடிவடைய நீண்ட காலம் ஆகும் என்பதால், அதுவரைஅவரை சிறையில் வைத்திருக்க முடியாது என்பதால் தான் அவருக்கு உச்சநீதிமன்றம் பிணை வழங்கியுள்ளது. அதன் பொருள் விடுதலை இல்லை.

ஆனால், ஏழரை கோடி மக்களுக்கும் பொதுவான தமிழக முதல்வரோ, கடமையை மறந்து விட்டு செந்தில் பாலாஜி தியாகம் செய்ததாக புகழ்கிறாா்.

இதை பாா்க்கும்போது செந்தில் பாலாஜி மீதான மோசடி வழக்கு விசாரணை தமிழகத்தில் நியாயமாக நடக்கும் என்றோ, பாதிக்கப்பட்ட மக்களுக்கு நீதி கிடைக்கும் என்றோ தோன்றவில்லை.

எனவே, செந்தில் பாலாஜி மீதான வழக்கின் விசாரணையை வேறு மாநில நீதிமன்றத்துக்கு மாற்றும்படி உச்சநீதிமன்றத்துக்கு தமிழக அரசு பரிந்துரைக்க வேண்டும் என்று ராமதாஸ் கூறியுள்ளாா்.