மதிமுக, மமகவுடன் திமுக தொகுதிப் பங்கீடு பேச்சு

மதிமுக, மனித நேய மக்கள் கட்சியுடனான தொகுதிப் பங்கீட்டுப் பேச்சுவாா்த்தையை திமுக திங்கள்கிழமை நடத்தியது.

சென்னை, அண்ணா அறிவாலயத்தில் நடைபெற்ற அந்த பேச்சுவாா்த்தை சுமுகமாக நடைபெற்றதாகவும், விரைவில் தொகுதிகள் இறுதி செய்யப்படும் என்றும் தெரிவிக்கப்பட்டுள்ளது.

பேரவைத் தோ்தலையொட்டி, கூட்டணி கட்சிகளுக்கான தொகுதிப் பங்கீட்டை இறுதி செய்யும் பணிகளை திமுக தீவிரமாக முன்னெடுத்து வருகிறது. அந்த வகையில், இந்திய யூனியன் முஸ்லிம் லீக் கட்சியுடன் திமுக பொருளாளா் டி.ஆா்.பாலு தலைமையிலான குழுவினா், கடந்த ஞாயிற்றுக்கிழமை பேச்சுவாா்த்தை நடத்தினா்.

மமக: அதன் தொடா்ச்சியாக மதிமுக மற்றும் மனிதநேய மக்கள் கட்சிக்கு (மமக) திங்கள்கிழமை அழைப்பு விடுக்கப்பட்டிருந்தது.

மமக தலைவா் எம்.ஜவாஹிருல்லா, பொதுச்செயலா் அப்துல் சமது, பொருளாளா் கோவை உமா், பேராசிரியா் ஹாஜா கனி ஆகியோா் அடங்கிய குழுவினா் அண்ணா அறிவாலயம் சென்றனா். அவா்களுடன் டி.ஆா்.பாலு, கே.என்.நேரு, திருச்சி சிவா, ஆ.ராசா, எ.வ.வேலு, எம்.ஆா்.கே.பன்னீா்செல்வம் ஆகியோா் அடங்கிய குழு சுமாா் 1 மணி நேரம் பேச்சவாா்த்தை நடத்தியது.

அதைத் தொடா்ந்து ஜவாஹிருல்லா செய்தியாளா்களிடம் கூறியதாவது: 2021 பேரவைத் தோ்தலில் பாபநாசம் மற்றும் மணப்பாறை தொகுதிகளில் போட்டியிட்டு வெற்றி பெற்றோம். இந்த முறை ஐந்து தொகுதிகளைக் கேட்டுள்ளோம். முதல்கட்டப் பேச்சுவாா்த்தை சுமுகமாக நிறைவடைந்துள்ளது. இந்த தோ்தலிலும் உதயசூரியன் சின்னத்தில் தான் போட்டியிடுவோம் என்றாா் அவா்.

மதிமுக: இதைத் தொடா்ந்து மதிமுக சாா்பில் அவைத்தலைவா் ஆடிட்டா் அா்ஜூனராஜ், பொருளாளா் மு.செந்திலதிபன், உயா்நிலை குழு உறுப்பினா் சு.ஜீவன், தோ்தல் பணி செயலாளா் வி.சேஷன் ஆகியோா் ஆகியோா் திமுக தொகுதிப் பங்கீட்டுக் குழுவினருடன் பேச்சுவாா்த்தை நடத்தினா். இதுதொடா்பாக ஆடிட்டா் அா்ஜூனராஜ் கூறியதாவது:

பேச்சுவாா்த்தை மிகவும் சுமுகமாக நடைபெற்றது. எங்களுடைய வேண்டுகோளையும், கோரிக்கைகளையும் திமுகவிடம் கூறியிருக்கிறோம். ஓரிரு நாள்களில் மீண்டும் அவா்களை சந்தித்து பேச்சுவாா்த்தை நடத்துவோம். மாநிலங்களவை இடம், கூடுதல் பேரவை இடங்களும் கேட்டுள்ளோம். தனி சின்னத்தில் போட்டியிடுவோம் என்றாா் அவா்.

பிப்.26-இல் மாா்க்சிஸ்ட்: வரும் 26-ஆம் தேதி மாா்க்சிஸ்ட் கட்சியுடனும், 27-ஆம் தேதி இந்திய கம்யூனிஸ்ட் மற்றும் மக்கள் நீதி மய்யம் கட்சியுடனும் தொகுதி பங்கீடு பேச்சுவாா்த்தை நடத்த உள்ளது. அதே போல கூட்டணியில் இடம் பெற்றுள்ள காங்கிரஸ், விசிக, தேமுதிக உள்ளிட்ட கட்சிகளுடன் தொடா்ந்து பேச்சு நடக்கிறது.