மேக்கேதாட்டு விவகாரம் - மத்திய அரசிடம் தமிழக முதல்வா் பேச்சு நடத்த வேண்டும்: அன்புமணி

கா்நாடக முதல்வரிடம் தமிழக முதல்வா் ஜோசப் விஜய் பேச்சு நடத்துவதை விடுத்து, மத்திய அரசிடம் பேச்சு நடத்தி மேக்கேதாட்டு அணைகட்டுவதைத் தடுக்க வேண்டும் என்று பாமக தலைவா் அன்புமணி ராமதாஸ் தெரிவித்தாா்.

இதுகுறித்து அவா் சென்னையில் செய்தியாளா்களிடம் வியாழக்கிழமை கூறியதாவது:

மேக்கேதாட்டு அணை தொடா்பாக முதல்வா் விஜய் கா்நாடகத்துக்குச் சென்று பேச்சு நடத்தினால் அது தமிழகத்துக்கு மிகப் பெரிய பாதகமாக அமையும். ஏனெனில், மேக்கேதாட்டு அணையை நாம் ஏற்றுக் கொள்ளவில்லை. அப்படி இருக்கும்பட்சத்தில் அதுதொடா்பாக பேச்சு நடத்துவதில் எந்த அா்த்தமும் கிடையாது.

இதுதொடா்பாக மத்திய அரசிடம்தான் பேச்சு நடத்த வேண்டும். மத்திய அரசுக்குத்தான் நாம் அழுத்தம் கொடுத்து மேக்கேதாட்டு அணை கட்டுவதைத் தடுக்க வேண்டும்.

சதிக்கு முதல்வா் பலியாகக் கூடாது: மேக்கேதாட்டு அணை விவகாரம் தொடா்பாக முதலில் அனைத்துக் கட்சி கூட்டத்தை முதல்வா் விஜய் கூட்ட வேண்டும்.

இது தவெக பிரச்னையாக பாா்க்கக் கூடாது. பாஜகவும், காங்கிரஸும் இந்த விவகாரத்தில் கைகோத்து சதி செய்கிறாா்கள். இந்த சதியில் முதல்வா் விஜய் பலியாகிவிடக் கூடாது.

ராகுல் ஒருவாா்த்தை கூறினால்...: அந்தமானில் காடுகளை அழித்து கட்டுமானம் செய்ய கூடாது எனக் கூறிய ராகுல்காந்தி, தமிழகத்துக்கு வரும்போது மேக்கேதாட்டு அணை கட்டக் கூடாது என்று பேசுவாரா? மேக்கேதாட்டில் அணை கட்டக் கூடாது என்று ஒரு வாா்த்தை ராகுல்காந்தி கூறினால், தேசிய ஜனநாயக கூட்டணியில் இருந்து பாமக விலகத் தயாராக உள்ளது என்றாா் அன்புமணி.