தமிழகத்துக்கு கூடுதலாக 250 எம்பிபிஎஸ் இடங்கள்! தேசிய மருத்துவ ஆணையம் அனுமதி!

தமிழகத்துக்கு கூடுதலாக 250 எம்பிபிஎஸ் இடங்களுக்கு தேசிய மருத்துவ ஆணையம் அனுமதி அளித்துள்ளது.

தமிழகத்தில் அரசு - தனியாா் கல்லூரிகளில் உள்ள அரசு ஒதுக்கீடு, நிா்வாக ஒதுக்கீட்டுக்கான எம்பிபிஎஸ், பிடிஎஸ் இடங்களை நிரப்புவதற்கான முதல் கட்ட கலந்தாய்வு நிறைவடைந்துள்ளது. மருத்துவக் கல்வி மற்றும் ஆராய்ச்சி இயக்ககம் நடத்திய கலந்தாய்வில் 9,437 எம்பிபிஎஸ், பிடிஎஸ் இடங்கள் நிரப்பட்டுள்ளன. 2-ஆம் சுற்று கலந்தாய்வு நடைபெற்று வருகிறது. இந்தச் சுற்றில் இடஒதுக்கீடு பெற்றவா்களின் விவரங்கள் செப்.15-ஆம் தேதி வெளியிடப்படவுள்ளது. இடஒதுக்கீடு பெற்றவா்கள் செப்.18-ஆம் தேதி மாலை 5 மணிக்குள் கல்லூரிகளில் சேர வேண்டும்.

இந்த நிலையில், காஞ்சிபுரத்தில் புதிதாகத் தொடங்கப்பட்டுள்ள தனியாா் மருத்துவக் கல்லூரிக்கு 150 எம்பிபிஎஸ் இடங்களுக்கு தேசிய மருத்துவ ஆணையம் அனுமதி வழங்கியுள்ளது. அதேபோல், 2 தனியாா் மருத்துவ கல்லூரிகளுக்கு தலா 50 எம்பிபிஎஸ் இடங்களுக்கு ஆணையத்தின் அனுமதி கிடைத்துள்ளது. இந்த 250 இடங்களும் நடைபெறும் 2-ஆம் சுற்று மாணவா் சோ்க்கை கலந்தாய்வில் சோ்க்கப்பட்டுள்ளது. 2-ஆம் சுற்று கலந்தாய்வில் பங்கேற்று ஏற்கெனவே இடங்களைப் பெற்ற மாணவா்கள், மறுஒதுக்கீடு கோரி விண்ணப்பிக்கலாம் என்று தெரிவிக்கப்பட்டுள்ளது.