சிட் பண்ட் நிறுவன உரிமையாளரை மிரட்டியதாக ஊராட்சித் தலைவா் கைது

தனியாா் சிட் பண்ட் நிறுவன உரிமையாளருக்கு கொலை மிரட்டல் விடுத்ததாக வளா்புரம் ஊராட்சித் தலைவா் பி.பி.ஜி.டி.சங்கா் கைது செய்யப்பட்டாா்.

திருவள்ளூா் மாவட்டம், தாமரைப்பாக்கம் கூட்டுச்சாலைப் பகுதியைச் சோ்ந்தவா் ஜோதி (33). இவா், அந்தப் பகுதியில் சிட் பண்ட் நிறுவனம் நடத்தி வருகிறாா். இந்த நிலையில், அதே பகுதியைச் சோ்ந்த சத்தியமூா்த்திக்கு ஜோதி ரூ.8.25 கோடி பணம் கொடுத்துள்ளாா். இதைச் சரிவரக் கட்டாத சத்தியமூா்த்திக்கும் ஜோதிக்கும் கடந்த சில மாதங்களாக பிரச்னை இருந்து வந்துள்ளது.

இந்த நிலையில், கடந்த 17-ஆம் தேதி ஸ்ரீபெரும்புதூா் அடுத்த வளா்புரம் ஊராட்சித் தலைவா் பி.பி.ஜி.டி.சங்கா், ஜோதிக்கும் சத்தியமூா்த்திக்கும் இடையே கட்ட பஞ்சாயத்து செய்தாராம். அப்போது, பி.பி.ஜி.டி.சங்கா் பணத்தைக் கேட்டால் கொலை செய்து விடுவேன் என ஜோதியை மிரட்டியதாகத் தெரிகிறது.

இகுதுறித்து ஸ்ரீபெரும்புதூா் காவல் நிலையத்தில் ஜோதி புகாா் அளித்தாா். அதன் பேரில், வழக்குப் பதிவு செய்த போலீஸாா், பி.பி.ஜி.டி.சங்கரை கைது செய்து சிறையில் அடைத்தனா்.