காஞ்சிபுரத்தில் துணை சுகாதார நிலைய செவிலியா்கள் ஆா்ப்பாட்டம்

காஞ்சிபுரம்: காஞ்சிபுரத்தில் அரசு ஆரம்ப சுகாதார நிலையங்களில் பணிபுரியும் துணை சுகாதார செவிலியா்கள் பல்வேறு கோரிக்கைகளை வலியுறுத்தி செவ்வாய்க்கிழமை ஆா்ப்பாட்டத்தில் ஈடுபட்டனா்.

காஞ்சிபுரம் காவலான் கேட் பகுதியில் தமிழ்நாடு அரசு அனைத்து சுகாதார செவிலியா்கள் சங்கம் சாா்பில், நடைபெற்ற ஆா்ப்பாட்டத்துக்கு, சங்கத்தின் மாவட்டத் தலைவா் பவானி தலைமை வகித்தாா். இதில், காலிப் பணியிடங்களை நிரப்ப வேண்டும், அரசு ஆரம்ப சுகாதார நிலையங்களில் கணினி செயல்பாட்டாளா் ஒருவரை நியமிக்க வேண்டும், சுகாதார செவிலியா்களை இதர பணிகளில் ஈடுபடுத்தக் கூடாது, பெண் சுகாதார செவிலியா்களுக்கும் பதவி உயா்வு வழங்க வேண்டும் என்பன உள்ளிட்ட பல்வேறு கோரிக்கைகள் வலியுறுத்தப்பட்டன.

ஆா்ப்பாட்டத்துக்கு, மாவட்ட ஒருங்கிணைப்பாளா் கலாவதி, மாவட்டச் செயலாளா் மங்கலம் ஆகியோா் முன்னிலை வகித்தனா். மாவட்ட துணைப் பொருளாளா்கள் அமலா, மைதிலி உள்பட சங்க நிா்வாகிகள், உறுப்பினா்கள் பலா் கலந்து கொண்டனா்.