தெற்காசியாவிலேயே சிறந்த மாநிலமாக தமிழகத்தை மேம்படுத்த வேண்டும்: முதல்வா் மு.க.ஸ்டாலின்

தமிழ்நாட்டை இந்தியாவில் மட்டுமல்ல, தெற்காசியாவிலேயே முதலீடுகள் மேற்கொள்ள சிறந்த மாநிலமாக மேம்படுத்த வேண்டும் என பனப்பாக்கத்தில் சனிக்கிழமை நடைபெற்ற டாடா மோட்டாா்ஸ் தொழிற்சாலை அடிக்கல் நாட்டு விழாவில் முதல்வா் மு.க.ஸ்டாலின் தெரிவித்தாா்.

ராணிப்பேட்டை மாவட்டம், நெமிலி வட்டம், பனப்பாக்கத்தில் தமிழக அரசின் தொழில் துறையால் அமைக்கப்பட்ட சிப்காட் வளாகத்தில் ரூ.9,000 கோடி முதலீட்டில் டாடா மோட்டாா்ஸ் வாகன உற்பத்தி தொழிற்சாலை அமைப்பதற்கு அடிக்கல் நாட்டி முதல்வா் மு.க.ஸ்டாலின் பேசியதாவது:

தற்போது டாடா மோட்டாா்ஸ் நிறுவனத்தின் மேம்பட்ட பயணிகள் வாகன உற்பத்தி திட்டத்துக்கு அடிக்கல் நாட்டியிருப்பதற்கு மகிழ்ச்சி அடைகிறேன். இந்தியாவின் பெரிய நிறுவனங்களுக்கு மட்டுமல்ல, உலகின் பெரிய நிறுவனங்களுக்கும் தமிழ்நாடுதான் முதல் முகவரியாக விளங்கிக் கொண்டிருக்கிறது.

இந்தியாவின் தொழில் முகங்களில் முக்கியமானது டாடா நிறுவனம். எஃகு, தகவல் தொழில்நுட்பம், விமானப் போக்குவரத்து, ஆட்டோ மொபைல்ஸ், நுகா்வோா் பொருள்கள், விருந்தோம்பல், தொலைத்தொடா்பு உள்ளிட்ட துறைகளில் தடம் பதித்துள்ள டாடா குழுமம், உலக அளவில் 100-க்கும் மேற்பட்ட நாடுகளில் செயல்பட்டு வரும் இந்திய பன்னாட்டுக் குழுமம் ஆகும்.

டாடா மோட்டாா்ஸ் தனது திட்டத்துக்காக ராணிப்பேட்டை மாவட்டத்தைத் தோ்ந்தெடுத்துள்ளது. ரூ.9,000 கோடி முதலீடு செய்ததுடன், 5,000 பேருக்கு வேலைவாய்ப்பும் அளிக்கப்பட உள்ளது.

கடந்த 1973-ஆம் ஆண்டு முன்னாள் முதல்வா் கருணாநிதி தமிழ்நாட்டிலேயே முதல் சிப்காட்டை ராணிப்பேட்டையில்தான் தொடங்கினாா். 50 ஆண்டுகள் கடந்து இங்கு பல்வேறு நிறுவனங்களைப் பாா்ப்பது பெருமையாக உள்ளது.

தமிழ்நாடுதான் இந்தியாவின் வாகன உற்பத்தி தலைநகரம். அது மட்டுமல்ல, மின்சார வாகனங்களின் தலைநகரமும்கூட. ஃபோா்டு, ஹூண்டாய், ரெனால்ட் நிசான் ஆகிய சா்வதேச வாகன நிறுவனங்களும் இங்கே உள்ளன. சா்வதேச சந்தையில் விற்பனை செய்யப்படும் வாகனங்களைத் தயாரிக்கும் தொழிற்சாலைகளும் இங்கேதான் உள்ளன.

இந்தியாவில் விற்பனை செய்யப்படும் மொத்த மின் வாகனங்களில் 40% தமிழ்நாட்டில்தான் உற்பத்தி செய்யப்படுகின்றன. மின்னணு ஏற்றுமதியிலும் தமிழ்நாடுதான் முதலிடத்தில் உள்ளது. நாட்டின் வளா்ச்சியில் தமிழ்நாடு முக்கியப் பங்கு வகிக்கிறது. நாட்டில் இரண்டாவது பெரிய பொருளாதாரமாக தமிழ்நாடு விளங்கிக் கொண்டிருக்கிறது.

ஒரு டிரில்லியன் டாலா் இலக்கு: தொழில் துறைக்கு நான் வழங்கியிருக்கும் இலக்கு 2030-ஆம் ஆண்டுக்குள் தமிழ்நாட்டை ஒரு டிரில்லியன் அமெரிக்க டாலா் பொருளாதாரமாக மாற்ற வேண்டும் என்பதுதான்.

இந்தியாவில் மட்டுமல்ல, தெற்காசியாவிலேயே முதலீடுகள் மேற்கொள்ள சிறந்த மாநிலமாக தமிழ்நாட்டை மேம்படுத்த வேண்டும். திமுக அரசு பொறுப்பேற்றதில் இருந்து ரூ.10 லட்சம் கோடிக்கு மேல் முதலீடுகளை ஈா்த்துள்ளோம். 31 லட்சம் பேருக்கு நேரடி மற்றும் மறைமுக வேலைவாய்ப்பை ஏற்படுத்திக் கொடுத்துள்ளோம் என்றாா்.

விழாவில் டாடா குழுமத் தலைவா் சந்திரசேகரன், நீா்வளத் துறை அமைச்சா் துரைமுருகன், கைத்தறி, துணிநூல் துறை அமைச்சா் ஆா்.காந்தி, தொழில் முதலீட்டு ஊக்குவிப்பு, வா்த்தகத் துறை அமைச்சா் டி.ஆா்.பி.ராஜா, அரக்கோணம் எம்.பி. எஸ்.ஜெகத்ரட்சகன், எம்எல்ஏ-க்கள் ஏ.எம்.முனிரத்தினம் (சோளிங்கா்), ஜெ.எல்.ஈஸ்வரப்பன் (ஆற்காடு), பி.காா்த்திகேயன் (வேலூா்), அரசு தலைமைச் செயலா் நா.முருகானந்தம், தொழில் முதலீட்டு ஊக்குவிப்பு, வா்த்தகத் துறை செயலா் வி.அருண்ராய், சிப்காட் மேலாண்மை இயக்குநா் கி.செந்தில்ராஜ், வழிகாட்டி நிறுவன மேலாண்மை இயக்குநா் வே.விஷ்ணு, ராணிப்பேட்டை மாவட்ட ஆட்சியா் ஜெ.யு.சந்திரகலா, டாடா குழும தலைமை நிதி அலுவலா் பி.பி.பாலாஜி, டாடா மோட்டாா்ஸ் நிறுவன மேலாண்மை இயக்குநா் சைலேஷ் சந்திரா, ஜெ.எல்.ஆா். நிறுவன இயக்குநா் ஃபிராங்க் லட்விக் மற்றும் உயரதிகாரிகள் பங்கேற்றனா்.

முன்னதாக, பனப்பாக்கம் வந்த முதல்வரை திமுக சுற்றுச்சூழல் அணி மாநில இணைச் செயலா் வினோத் காந்தி, ராணிப்பேட்டை நகா்மன்றத் தலைவா் சுஜாதா வினோத், துணைத் தலைவா் ரமேஷ் கா்ணா, நெமிலி ஒன்றியக் குழு தலைவா் பெ.வடிவேல், திமுக ஒன்றியச் செயலா்கள் எஸ்.ஜி.சி. பெருமாள், ரவீந்திரன், பனப்பாக்கம் பேரூராட்சித் தலைவா் கவிதா சீனிவாசன் உள்ளிட்டோா் வரவேற்றனா்.