கேட்பாரற்று கிடந்த 450 கிலோ ரேஷன் அரிசி பறிமுதல்

அரக்கோணம் ரயில் நிலையத்தில் 22 மூட்டைகளில் கேட்பாரற்று கிடந்த 450 கிலோ ரேஷன் அரிசி பறிமுதல் செய்யப்பட்டது.

அரக்கோணம் வழியாக ஆந்திர மாநிலத்திற்கு தமிழக அரசு ரேஷன் அரிசி மூட்டை மூட்டையாக கடத்த படுவதாக வந்த தகவல்களை அடுத்து ரயில் நிலையப்பகுதிகளில் ராணிப்பேட்டை வருவாய்த் துறையினா், ரயில்வே காவல் நிலைய போலீஸாரோடு இணைந்து ரோந்து சென்றனா்.

ராணிப்பேட்டை மாவட்ட வழங்கல் அலுவலா் பன்னீா்செல்வம் தலைமையிலான வருவாய்த் துறையினா் மற்றும் அரக்கோணம் ரயில் நிலைய காவல் உதவி ஆய்வாளா் பூபாலன் தலைமையிலான இரு குழுவினரும் இணைந்து செவ்வாய்க்கிழமை அரக்கோணம் ரயில் நிலையத்தில் சோதனை செய்தனா்.

அப்போது அரக்கோணத்தில் இருந்து ஆந்திர மாநிலம் திருச்சானூருக்கு செல்லும் மின்சார ரயில் புறப்பட தயாராக இருந்தது. அப்போது நடைமேடையில் இருக்கைகளுக்கு கீழே சில அரிசி மூட்டைகள் இருந்ததை கண்டு அதை சோதனை செய்த போது அதில் ரேஷன் அரிசி இருந்தது கண்டறியப்பட்டது. அதே நேரம் அப்பகுதியிலேயே நின்றிருந்த ரயிலிலும் அதே போல் சில மூட்டைகளில் ரேஷன் அரிசி இருந்ததும் கண்டறியப்பட்டது.

இதையடுத்து இரு இடங்களிலும் இருந்த ரேஷன் அரிசி மூட்டைகள் மொத்தம் 22 மூட்டைகள், 450 கிலோ ரேஷன் அரிசியை அதிகாரிகள் பறிமுதல் செய்து மாவட்ட வழங்கல் அலுவலா் பன்னீா்செல்வம் முன்னிலையில் அரக்கோணத்தில் உள்ள தமிழக அரசின் நுகா்பொருள் வாணிப கழக கிடங்கில் ஒப்படைத்தனா்.