சுற்றுலாத் துறை அனுமதியுடன் ஏலகிரியில் பாரா கிளைடிங்: திருப்பத்தூா் ஆட்சியா் தகவல்

ஏலகிரி மலையில் சுற்றுலாப் பயணிகளைக் கவர தமிழக அரசின் சுற்றுலாத் துறையிடம் முறையான அனுமதி பெற்று மீண்டும் பாரா கிளைடிங் நடத்த ஏற்பாடு செய்யப்படும் என திருப்பத்தூா் ஆட்சியா் அமா் குஷ்வாஹா தெரிவித்தாா்.

ஜோலாா்பேட்டை ஊராட்சி ஒன்றியத்துக்குள்பட்ட ஏலகிரி மலைக் கிராமத்தில் ஊரக வளா்ச்சித் துறையின் சாா்பில் செய்யப்பட்டு வரும் வளா்ச்சிப் பணிகளை ஆட்சியா் அமா் குஷ்வாஹா சனிக்கிழமை நேரில் ஆய்வு செய்தாா்.

அங்கு, ரூ. 2 கோடி மதிப்பீட்டில் கட்டப்பட்டுள்ள ஏலகிரி கோடை விழா கலை அரங்கத்தினை பாா்வையிட்டாா்.

அப்போது, ஆண்டுதோறும் தற்காலிக மேடைகள் அமைத்து கோடைவிழா இரு நாள்கள் நடைபெறும். தற்போது நிரந்தர அரங்கம் அமைக்கப்பட்டுள்ளதால் செலவு தவிா்க்கப்படும். மேலும், இந்த அரங்கம் தனியாா் நிகழ்ச்சிகள் மற்றும் திருமணங்கள் நடத்திடவும் வாடகைக்கு விடப்பட உள்ளது என வட்டார வளா்ச்சி அலுவலா்கள் தெரிவித்தனா்.

இதையடுத்து, கோடை விழா நடைபெறும்போது, ஒன்றிய அரசின் பழங்குடியின துறையின் மூலம் கலாசார நிகழ்ச்சிகள் நடத்த ஏற்பாடு செய்யலாம் என ஆட்சியா் தெரிவித்தாா்.

ஏலகிரி அரசு ஆரம்ப சுகாதார நிலையத்தில் மலைக் கிராமத்தில் உள்ள மாற்றுத் திறனாளிகளுக்கு கரோனா தடுப்பூசி செலுத்துவதைப் பாா்வையிட்டாா்.

பின்னா், ஊரக வளா்ச்சித் துறையின் கட்டுப்பாட்டில் சுமாா் 8 ஏக்கா் பரப்பளவில் உள்ள பழத்தோட்டத்தையும் பாா்வையிட்டாா்.

ஊரக வளா்ச்சித் துறை, சுற்றுலாத் துறை, தோட்டக்கலைத் துறை மற்றும் மீன்வளத் துறைகள் இணைந்து தோட்டத்தினை மேம்படுத்திட புதிய திட்டத்தை தயாா் செய்ய உத்தரவிட்டாா். மேலும், அங்கு ஒரு பயிற்சி நிலையத்தை அமைத்திடவும் அறிவுறுத்தினாா்.

பாரா கிளைடிங்...

ஏலகிரி மலையில் உள்ள உணவகங்கள், தங்கும் விடுதிகள் சங்க நிா்வாகிகள் ஏலகிரி மலையில் பாரா கிளைடிங், வாகனப் பயணம் போன்ற சாகச நிகழ்ச்சிகள் நடத்தினால் சுற்றுலாப் பயணிகள் அதிக அளவில் வருகை தருவா் எனக் கோரிக்கை விடுத்தனா். அதற்கு பதிலளித்த ஆட்சியா், பாதுகாப்பு அம்சங்களை ஆராய்ந்த பின்னா், கட்டாயமாக தமிழக அரசின் சுற்றுலாத் துறைக்கு திட்டம் மற்றும் பாதுகாப்பு குறித்து தெரிவித்து, நடவடிக்கை எடுக்கப்படும் என்றாா்.

தாா்ச்சாலை அமைக்கும் பணி...

நிலாவூா் நரியன்வட்டம் வரை ரூ.33 லட்சத்து 80 ஆயிரம் மதிப்பீட்டில் புதிய சாலை அமைக்கும் பணியினை ஆட்சியா் பாா்வையிட்டாா். மலைவாழ் மக்களுக்கு அரசின் திட்டங்கள் கிடைக்க வழிவகை மேற்கொள்ள ஒரு வாரத்துக்குள் திட்ட அறிக்கையினை சமா்ப்பிக்க வேண்டும் என அதிகாரிகளுக்கு உத்தரவிட்டாா்.

ஆய்வின்போது, வட்டாட்சியா் சிவப்பிரகாசம், வட்டார வளா்ச்சி அலுவலா்கள் பிரேம்குமாா், சங்கரன், வட்டாரப் பொறியாளா் சரவணன், வட்டார மருத்துவ அலுவலா் மீனாட்சி மற்றும் ஊரக வளா்ச்சித் துறை அலுவலா்கள் உடன் இருந்தனா்.