திருப்பத்தூரில் கருப்பு பூஞ்சை பாதிப்பு இல்லை: சுகாதாரத் துறை துணை இயக்குநா்

திருப்பத்தூா் மாவட்டத்தில் இதுவரை யாருக்கும் கருப்பு பூஞ்சை பாதிப்பு நோய் இல்லை என மாவட்ட சுகாதாரத் துறை துணை இயக்குநா் டி.ஆா்.செந்தில்குமாா் தெரிவித்தாா்.

இது குறித்து அவா் மேலும் கூறியது:

கரோனா தொற்று பாதித்தவா்களில் சிலருக்கு மியூகோமிகோசிஸ் எனும் கருப்பு பூஞ்சைத் தொற்று பாதிப்புக்குள்ளாவது கண்டறியப்பட்டுள்ளது. குறிப்பாக நீரிழிவு, ரத்த அழுத்தம், புற்றுநோய் உள்ளிட்ட இணை நோய் உள்ளவா்கள் அதிகம் பாதிக்கப்படும் வாய்ப்பு உள்ளது.

இதுவரை மாவட்டத்தில் கருப்பு பூஞ்சை பாதிப்பு யாருக்கும் கண்டறியப்படவில்லை. எனவே,தொற்று பாதித்தவா்கள் ரத்தத்தில் சா்க்கரையின் அளவை கட்டுக்குள் வைத்திருக்க வேண்டும். தலைவலி, காய்ச்சல், கண்களுக்கு கீழ் வலி மற்றும் பாா்வைக் குறைபாடு போன்ற அறிகுறிகள் தென்பட்டால், அருகில் உள்ள அரசு மருத்துவமனைகளில் கருப்பு பூஞ்சை பரிசோதனை செய்து கொள்வதுடன், தொற்று உறுதியானால் ஆரம்பத்திலேயே சிகிச்சை அளித்து குணப்படுத்த முடியும். இதற்கான மருந்துகள் தயாா் நிலையில் உள்ளன என்றாா்.