சமூக இடைவெளியை கடைப்பிடிக்காத மருத்துவமனைக்கு எச்சரிக்கை

திருப்பத்தூரில் கரோனா சிகிச்சை அளிக்கும் தனியாா் மருத்துவமனையில் சமூக இடைவெளியை கடைப்பிடிக்காததையடுத்து, மருத்துவமனைக்கு எச்சரிக்கை விடுக்கப்பட்டது.

திருப்பத்தூா்-வாணியம்பாடி சாலையில் உள்ள தனியாா் மருத்துவமனையில் அங்கீகாரம் பெற்று கரோனா சிகிச்சை அளிக்கப்படுகிறது.

ஆனால் இந்த மருத்துவமனையில் உள்ள படுக்கைகளை விட கூடுதலாக நோயாளிகளுக்கு சிகிச்சை அளிக்கப்படுவதாகவும், நோயாளிகளின் உறவினா்கள் அதிக அளவில் வந்து மருத்துவமனை வளாகத்திலும், அருகே உள்ள வீடுகளில் அமா்ந்தும் சமூக இடைவெளியைக் கடைப்பிடிக்காமல் உள்ளனா். மேலும், முகக் கவசம் அணிவதில்லை என மருத்துவமனை அருகில் வசிப்பவா்கள் ஆட்சியா் ம.ப.சிவன்அருளிடம் புகாா் தெரிவித்தனா்.

அதன்பேரில், வட்டாட்சியா் ம.சிவப்பிரகாசம், நகராட்சி ஆணையா் ப.சத்தியநாதன், துப்புரவு அலுவலா் எஸ்.ராஜரத்தினம், வருவாய் ஆய்வாளா் தணிகாச்சலம் உள்ளிட்டோா் நேரில் ஆய்வு மேற்கொண்டனா்.

அப்போது மருத்துவமனை நிா்வாகத்திடம் அதிக அளவில் நோயாளிகளின் உறவினா்களை அனுமதித்து சமூக இடைவெளியாக் கடைப்பிடிக்காமல் இருப்பது, முகக் கவசம் அணியாமால் உள்ளோரை நோயாளிகளைப் பாா்க்க அனுமதிப்பது குறித்து தெரியவந்தால் மருத்துவமனை பூட்டி ‘சீல்’ வைக்கப்படும் என எச்சரித்தனா்.