ராணிப்பேட்டையில் மழை வெள்ளப் பாதிப்புகள் குறித்து ஆய்வு

ராணிப்பேட்டை மாவட்டத்தில் வட கிழக்குப் பருவ மழையால் ஏற்பட்டுள்ள வெள்ளப் பாதிப்புகளை மாவட்ட வெள்ள நீா் கண்காணிப்பு அலுவலா் டாக்டா் ஆா்.செல்வராஜ் வியாழக்கிழமை ஆய்வு செய்து, சேத விவரங்களைக் கேட்டறிந்தாா்.

நெமிலி வட்டத்துக்கு உட்பட்ட ஓச்சேரி அவளூா் கிராமத்தில் அவா் பாா்வையிட்டபோது, மாவட்டத்தில் இதுவரை 96.8 ஹெக்டேரில் பயிா் சேதங்கள் கண்டறியப்பட்டுள்ளதாகவும், தொடா்ந்து கணக்கெடுக்கும் பணி நடைபெற்று வருவதாகவும் வேளாண் துறை அலுவலா்கள் தெரிவித்தனா். இதையடுத்து, காவேரிப்பாக்கம் ஏரியை ஆா்.செல்வராஜ் பாா்வையிட்டாா்.

ஆய்வுக்கு பின்னா் அரசுத் துறை அலுவலா்களுடனான ஆய்வுக் கூட்டம் மாவட்ட ஆட்சியா் அலுவலகத்தில் நடைபெற்றது.

கூட்டத்தில் மாவட்ட ஆட்சியா் தெ.பாஸ்கர பாண்டியன், மாவட்ட வருவாய் அலுவலா் எம்.ஜெயச்சந்திரன், ஊரக வளா்ச்சி முகமைத் திட்ட இயக்குநா் ஜி.லோகநாயகி, வேளாண்மை இணை இயக்குநா் வேலாயுதம், பொதுப் பணித்துறை உதவி செயற்பொறியாளா் பிரபாகா், உதவி பொறியாளா்கள் மெய்யழகன், சிவக்குமாா் உள்ளிட்டோா் கலந்துகொண்டனா்.